Kommunip inersimasoq innarluutilik ikiorserneqarnissaanut pinngitsaalisinnaanngilaa
Kommuni inersimasunut ADHD-qartunut arlalinnik neqerooruteqarpoq, innuttaasulli ikiorserneqarnissamik neqeroorummut pinngitsaalillugit akuersitissinnaanngilai, tassa innarluutilimmut ilaqutaasut pineqartumut suna pitsaanerpaanersoq pillugu qanorluunniit isumaqaraluarpata.
Angutip 36-nik ukiullip ADHD-eqartup ataasinngornermi Nuussuarmi inigisaminut mattulluni angajoqqaaminut politiinullu sioorasaarereernerata kingorna, angummut ataataasup innuttaasunut ernermisut ADHD-qartunut kommunip sullissisarnera apeqquserpaa.
Ataataasormi isumaqarpoq. Kommunip ikiuunnissamut akisussaaffini tigusimanngikkaa, tamatumalu malitsigisaanik sapaatip-akunnerani matumani pisoq, angutsip 36-nik ukiullip politiinit tigusarineqarneranik kinguneqartoq pisimavoq.
Cecilie Victoria Schierbeckip, Kommuneqarfik Sermersuumi oqartussaaffimmi pisortap erseqqissaassutigaa, kommunip innuttaasut inersimasut innarluutillit ikiorserneqarnissamik neqeroorummut pinngitsaalillugit akuersitissinnaanngikkai.
Kommuni ikiorsiissuteqartussaasoq
Taassuma oqaatigaa, kommunip suliassarigaa innuttaasup ulluinnarni inuunerata imminut ataqatigiinnissaanut ikiorsiissuteqassaluni.
Tarnimikkut nappaatillit katsorsarneqarnissaat peqqinnissaqarfimmit isumagineqartussaavoq, innuttaasullu peqqarniitsumik pisartut politiinit isumagineqartussaallutik, soorlu sapaatip-akunnerani matumani siusinnerusukkut taamatut pisoqartoq.
- Kommuneqarfik Sermersuumit oqartussat taakku marluk suleqatigilluartarpavut, Cecilie Victoria Schierbeck Sermitsiaq.AG-mut oqarpoq.
Taassuma ilisimatitsissutigaa, innuttaasunut ulluinnarni isumagisassanut ikiorserneqarnissamik tapersersorneqarnissamillu pisariaqartitsisunut komuni inummik tapersersorteqarnissamik, angallassinissamik ilagisaqartitsinissamillu neqerooruteqartartoq. Aamma innuttaasut innarluutillit inunnik allanik peqateqarnissamik peqatigiillunilu sammisaqarnissamik pisariaqartitsisut, sammisassaqartitsiviullunilu peqatigiiffiusartumi neqeroorutinik sammisaqariartorsinnaapput.
Innuttaasut ikiorserneqarnissamut pinngitsaalineqarsinnaanngitsut
Inissat eqqarsaatigalugit najugaqatigiiffiit inersimasunut innarluutilinnut, tapersersorneqarnissamik isumassorneqarnissamillu pisariaqartitsisunut kiisalu allanik peqateqarusuttunut neqeroorutaapput. Periarfissaq alla tassaavoq najugaqatigiiffik, innuttaasunut ulloq unnuarlu paaqqutarineqarnissamik tapersersorneqarnissamillu pisariaqartitsisunut atugassiaq.
Aamma Sisimiuni nuna tamakkerlugu innarluutilinnut sullissivik, siunnersuisinnaasoq suliallu aalajangersimasut ingerlanneqarneranni ikiuussinnaasoq saaffigineqarsinnaavoq.
- Inersimasunut innarluutilinnut neqeroorutigineqartartut tamarmik assigiissutigaat, neqeroorfigineqartut namminneerlutik taakkununnga akuersaarnissaat. Innuttaasoq inersimasunngoraangat kommuni taamaallaat ikiorsiissuteqarnissamik neqerooruteqarsinnaavoq, neqeroorummut pinngitsaalillugit akuersitissinnaanngilavut, pisortaq erseqqissaavoq, itisiliillunilu:
- Erseqqissaassutigissallugu pingaaruteqarpoq, innuttaasut inersimasut tamarmik namminneq inuunertik pillugu aalajangiisussaatitaammata, tassa avatangiiserisat ilaqutaasullu isumaqataappata isumaqataanngippataluunniit apeqqutaatinnagit, Cecilie Victoria Schierbeck oqarpoq.