'Nunatsinnut iluaqutissat'

Kommunip Alcoa pillugu oqaaseqartoqannginnera amigaatigaa

Qeqqata Kommuniata nalunaarusiaq 'Kalaallit Nunaannut Iluaqutissaaqqullugu' iluarisimaarpaa, aluminiumilli aatsitsiviliornissap eqqaaneqannginnera amigaatigineqarluni

Hermann Berthelsenip Alcoa pillugu itinerusumik nalunaarusiorfigineqarnissaa pisariaqartippaa

Qeqqata Kommuniata Alcoap aluminiumik aatsitsiviliornissaa piviusunngussanersoq pissangassutigaa. Nalunaarusiami 'Kalaallit Nunaannut Iluaqutissaaqqullugu'-mi peqataanissaa pissangassutigineqarsimagaluarpoq, tassami ilisimatuut arlaqartut nalunaarusiami suliaqarmata.

Nalunaarusiamili ilaatinneqanngilaq.

Ilisimatuut arlaqartut januaarip 24-anni nalunaarusiaq saqqummiuppaat, tassani Kalaallit Nunaat namminersulivinnissaa aatsitassarsiornikkuinnaq anguneqarsinnaanngitsoq naqissuserneqarpoq. Ilisimatuut ilaatigut siunersuuteqarput aatsitassarsiornerup avataatigut ingerlanneqarsinnaasut allat eqqumaffigineqartariaqartut saqqummiunneqarlutik.

Alcoa iluaqutissartaqarpoq
Ilisimatuut nalunaarusiortoq ilaatigut Islandimiut misilittagaannik ilanngussipput, tassani aluminiumik aatsitivilk Fjordalimiitoq eqqartorneqarluni. Aatsitsiviup atuutilernerani sulisut 80 procentii nunaqavissuupput taakkulu ilimagisaasumit amerlanerupput. Qeqqata Kommunia aluminiumik aatsitivimmik Maniitsup eqqaani sanasoqassappat akileraarutitigut iseritaqarluarsinnaasoq, paaserusuivo sooq Alcoa pillugu itinerusumik nalunaarusiortoqarsimannginnersoq, tassami ukiuni arlaqartuni eqqartorneqarnikuummat.

- Soormita ilisimatuunit itinerusumik Maniitsup eqqaani aluminiummimik aatsitiviliorsinnaaneq suliarineqarsimanngila, tassami nunani sanilerisagut taama ingerlalluartigisimasut, Qeqqata Kommuniani borgmesteri Hermann Berthelsen Siumumeesoq oqarpoq.

Qeqqata Kommunia isumaqarpoq amerlanerusunik iluaqutissaqassasoq aluminiummimik aatsitiviliortoqassappat aatsitassarsiorfimmik ammanissamut sanilliullugu. Aatsisiviliorfissarmi illoqarfiup eqqaaniissaaq, erngup nukinga atorneqassalluni, kiisalu aatsitassanik allamit pilersorneqartussaalluni iluaqutaajumaartumik.

- Qeqqata Kommunianit isumaqarpugut ilisimatuunit Naalakkersuisuniillu maluginiarneqarnerusariaqartugut aluminiumik aatsitsiviliornissaq eqqarsaatigalugu. Iluaqutissartaqaqaarmi, tassami ilisimatuut taanikuuaat Maniitsup eqqaani ammaasoqassappat kommunimut Kalaallit Nunaannullu tamanut iluaqutaajumaartoq, Hermann Berthelsen oqarpoq.

Powered by Labrador CMS