Skip to main content

Kommunimut qinigassanngortittoq: Perorsaasut amigaatigineqarnerannut aaqqiissutissat aajuku

Angajoqqaat meeqqaminnik paarsillutik angerlarsimaannartitserusuttunut tapiissutit aamma aanaakkut aataalu meeqqerivinni. Kommuneqarfik Sermersuumi kommunimut qinigassanngortittoq, Avaaraq Olsen perorsaasut amigaatigineqarnerannut aaqqiissutissanik taama siunnersuuteqarpoq.

Meeqqerivinni perorsaasut amigaatigineqarnerannut aaqqiissutissanik ujartuinermi allatut eqqarsarnissaq pisariaqalerpoq.

Assaat kissartut, isumassuisinnaasut meeqqanullu ilisimasanik nutaanik tunioraasinnaasut perorsaasut assariinnarsinnaanngilai.

Kommuneqarfik Sermersuumi kommunalbestyrelsemut qinigassanngortittoq, Avaaraq S. Olsen (IA) taama isumaqarpoq.

Taassuma siunnersuutigaa soraarnerussutisiaqalersimasut meeqqerivinni tapertatut ikiuuuttussatut atorneqarnissaat, soorunami meeqqererusuppata.

- "Assaat kissalaartut” amerlanerusut pisariaqartippavut, uanilu isumaqarpunga utoqqaat inuiaqatigiinni atorluarneqarnerusariaqartut. Piffissaq tamakkiisumik sulineq pineqanngilaq, takorloorpara sap. akunneranut akunnerit arlallit utoqqaat piumasut sulisalersinnaasut, Avaaraq S. Olsen tusagassiorfinnut nalunaarutimini allappoq.

Taassuma erseqqissaatigaa utoqqaat atorluarneqarpata, tamanna meeqqanut sulisunullu iluaqutaassasoq.

Utoqqaat nammattunngussanngillat

NPK-mi siulittaasup aanaakkut aataakkullu meeqqerivinni piffissap ilaa ikiortinngorsinnaanerat itigartivissinnaanngilaa. Arnaq Brønlund, NPK-mi siulittaasoq oqaluttuarpoq piffissap ilaani utoqqaat soraarninngorsimasut meeqqerivinni atorluarneqarsinnaasut, sammisat soorlu nunatsinni kulturi, qanga inooriaaseq assigisaallu sammineqarpata.

- Taama aaqqiineq paasineqassanngilaq utoqqaat suliassanik oqimaannerusunik nammakkersorneqassasut, perorsaasut suliassaraluinik. Ikiuunnerat isumaqartariaqarpoq sammisanut assigiinngitsunut tulluarsarlugu, utoqqaat ilisimasamikkut tunniussinnaasaat aallaavugalugit, Arnaq Brønlund oqarpoq.

Meeqqerivinni perorsaasut amigaataanerat qineqqusaarnermi oqallisaanerulerpoq MIO-p nalunaarusiortitsinerata "Kalaallit Nunaanni ulluunerani neqoroorutit" qineqqusaarnerup aallartinnerani saqqummiunneqarmat. MIO-p nalunaarusiamik saqqummiinermini piumasaraa politikkikkut aaqqiissoqassasoq.

Angerlarsimatitsisunut tapit

Avaaraq S. Olsenip aaqqiissutissatut siunnersuutaa alla tassaavoq angajoqqaat meeqqerivinniittuuteqaratik meeqqap angerlarsimatinneranut tapilersorneqarsinnaanissaat.

Danskit kommunit ilaat taama aaqqiissuteqarnerannut qinigassanngortittoq isumassarsiorsimavoq. Danmarkimi kommunit ilaanni angajoqqaat meeqqaminnik angerlarsimatitsillutik meeqqaniitsitsinngitsunut kommunalbestyrelse tapeqartitsinermut aalajangiisuusarpoq.

- Kommuneqarfik Sermersuumi periarfissaasariaqarpoq erninermut atatillugu sulinngiffeqarnerup piffissaliussaa qaangerlugu meerarisamik paarsaqarluni angerlarsimasinnaaneq, oqarpoq.

Meeqqeriviit artukkerneqarnerannut iluaqutaasussamik angajoqqaanut angerlarsimatitsiinnarusuttunut tapiissuteqartitsilernissamik sulissuteqarusuppoq. Taamatullu meeqqat ullup affaannaa meeqqerivinniittalernissaannut akinik nalimmassaajumalluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

Seneste Ugeavis

SENESTE NUUK - NYHEDER