Kommuni: Missingersuutinut inatsisip nutaap aningaasaqarnikkut pituttussavaatigut

Naalakkersuisut inatsisissatut siunnersuutaat nutaaq Kommuneqarfik Sermersuumit tigulluarneqanngilaq, kommmuni isumaqarmat, inatsit kommuninut ineriartortunut aporfiliissasoq.

Naalakkersuisut inatsissatut siunnersuutaanni anguniarneqarpoq, kommunit Namminersorlutillu Oqartussat ukiumoortumik missingersuutiminni aningaasartuutissanik killiliisarnissaat.

Missingersuutinut inatsimmi kommunit Nammminersorlutillu Oqartussat aningaasaqarnikkut amigartooruteqartassannginnerannik imaluunniit sinneqartooruteqartarnissaannik piumasaqaatitaqareerpoq, tamannalumi ippinnartoqartinneqanngilaq.

Inatsisissatulli siunnersuummi anguniarneqarpoq, ingerlatsinermut, sanaartornermut tapiissuteqartarnermullu aningaasartuutit ukiumut ét procentpointiinnarmik qaffanneqartassasut, ukiulli sisamat ingerlaneranni annerpaamik 2,00 procentpointimik qaffanneqartassasut.

Kommuneqarfik Sermersuumit tamanna kommuninut ineriartortunut "aningaasaqarnikkut pituttuinertut" taaneqarpoq.

- Taamatut siunnersuuteqartoqarnerani Naalakkersuisut illoqarfiit pingaarnersaannut akiuiniarlutik nutaamik suliniuteqartut isumaqarpunga, Kommuneqarfik Sermersuumi borgmesteri Charlotte Ludvigsen puffassimaarluni oqarpoq.

Inatsit aasamut atuutilissasoq

Kommuneqarfik Sermersuumit isumaqartoqarpoq, inatsit kommunip innuttaasunik sullissineranut ajornerulersitsissasoq:

- Ukiut tamarluinnangajaasa innuttaasuvut en procent angunngilaarlugu amerlisarput. Aningaasartuutigisartakkavut innuttaasut amerlassusaannut malinnaartissinnaanngikkutsigit periarfissatuarivarput, innuttaasunut kiffartuussisarnittat annikillisinneqarnissaa, tamannalu pinngitsoortinniarlugu sorsuuteqarniarpunga, borgmesteri oqarpoq.

Kommunip tusarniaanermut akissuteqaammini piumasarivaa, missingersuutinut inatsisissap 2021-mi juulip aallaqqaataani atuutsinneqalinnginnerani inatsisissami tassunga tunngasortaa peerneqassasoq.

Ajorluinnartumik kinguneqassasoq naatsorsuutigineqartoq

Inatsit taamatut isikkoqartillugu atuutsinneqalissappat, kommunip innuttaasunik kiffartuussineranut ajorluinnartumik kinguneqassasoq kommuni isumaqarpoq.

- Siunnersuut kommuninut ineriartortunu annertuumik aporfiliissaaq, kommuninulli inuerukkiartortunut sunniuteqassannani. Soorlulusooq Naalakkersuisut innuttaasutsinnik pillaanissamik siunertaqarlutik iliuuseqartut, Charlotte Ludvigsen oqarpoq.

Kommuneqarfik Sermersuumit naatsorsuutigineqarpoq, kommuni aningaasartuutigisartakkaminik killileeqquneqarpat kommuni unittuussasoq.

- Innuttaasut atugaannik pitsanngorsaarusullunga politikkerinngorsimavunga, maannali pissutsinik akuersiinnartussanngortinniarneqarpasippugut, tamannalu ajorluinnartutut isigaara, Ludvigsen oqarpoq.

Powered by Labrador CMS