Kommunimik miliuunilikkaanik nalilimmik niueqateqarsimaneq illersoraa: - Neqerooruterpassuarnik pissarsisimavuga
Kommuneqarfik Sermersuup illoqarfimmik ineriartortitseqatigiiffiutaata NCD-p hali 12,5 millioner koruunilerlugu pisiarimmagu ikinngummik ikiuinerunngilaq, halimik tunisaqarsimasoq Ekstra Bladetsimut oqarsimavoq.
Kommuneqarfik Sermersuumi inissaqartitsiniarluni suliaq qanittukkut misissuiffigineqarmat, suliamik ingerlatsisimaneq sakkortuumik isornartorsiorneqangaatsiarpoq.
Isornartorsiuinermut aamma kommunip illoqarfimmik ineriartortitseqatigiiffiutaa Siorarsiorfik - Nuuk City Development (NCD) ilanngunneqarpoq.
Misissuisimasup kommunip ingerlatseqatigiiffiullu akornanni pissutsit arlallit iluamik isumagisimanngisaannik isornartorsiuinermi saniatigut, NCD-p halimik pisiaqarsimanera pillugu suliaq erseqqissaassutigaa.
Ingerlatseqatigiiffiup siulersuisuini siulittaasup - kommunimi pisortaanerusimasup Lars Møller-Sørensenip kisaateqarneratigut - NCD-p Nuummi hali 12,5 millioner koruunilerslugu 2019-imi pisiarisimavaa. Misissuisimasoq naapertorlugu, hali inummit kommunimi pisortaanerusimasumut "niuernikkut qanimut suleqateqarsimasumit" pisiarineqarsimavoq.
Siulersuisuni issiaqatigiittarsimasut
Misissuisimasup ilanngullugu allassimavaa, halimik pisiaqarnissaq NCD-p ingerlatsinissamik pilersaarutaanut aallaqqaammut ilaasimanngitsoq.
Pingasunngornermi saqqummiunneqarpoq, halimik tunisaqarsimasuusoq tassaasoq John Eliassen, ingerlatseqatigiiffimmi JKE Investimi pisortaanerusoq aamma sanasut suliffeq3arfianni BJ Entreprisemi siulittaasuusoq. Ekstra Bladet taamatut allappoq.
John Eliassen aamma Lars Møller Sørensen ingerlatseqatigiiffiit arlallit siulersuisuini issiaqatigiittarsimapput, John Eliassen aamma Nuummi inimik Lars Møller-Sørensenip inigisanik arfinilinnik initaqartumik pæiginnittuuvoq.
John Eliasseip Ekstra Bladetsimut oqaatigisimavaa, NCD halimik pisiaqarmat ikinngummik ikiuisoqarsimanngitsoq. John Eliassenip tusagassiorfimmut oqaatigisimavaa, halimik pisiaqarnissamut soqutiginnittorpassuaqarsimasoq, Lars Møller-Sørensenilu aatsaat kommunimik Kiffartuussigasuartarfimmi pisortaq Gerth Jakobsen isumaqatigiissuteqarfigineqarmat pisiaqarnissamut ilanngunneqarsimasoq.
EB-mi tusagassiortoq issuerniaraa
John Eliassenilli Ekstra Bladetsip suliamut soqutiginninnera naammaginngilluinnarpaa:
- Aviisimi tamanna ilanngutassiarineqarniarpa? Ajortumik allaaserissagumma aggerlunga issuissavakkit. Ajortumik allaaserinnissanngilasi. Nalunngilara qanoq iliuuseqarsinnaasuni, taanna Ekstra Bladetsimut oqarsimavoq.
AAMMA ATUARUK: B. J. Entreprise: Taamaasioqqissanata neriorsuivugut
John Eliassen 2012-imi aamma sammineqarsimavoq, taamanikkut BJ Entreprisemi pisortaanertut 25.000 koruuninik akiligassinneqarsimalluni, aamma ingerlatseqatigiiffik suliarinnittussarsiuussinermi isumaqatigiissusiorsimaneq pillugu suliami annertuumi 670.000 koruuninik akiligassinneqarsimavoq.
Sermitsiaq.AG-mit Lars Møller-Sørensen pineqartumut atatillugu oqaaseqartinniarneqarsimavoq. Pineqartorli manna oqaaseqarfigerusussimanngilaa, Ekstra Bladetsimulli oqaatigisimavaa isornartorsiummi pineqartumi pinngitsuunini kingusinnerusukkut uppernarsarniarlugu. Pisortaanerusimasup tamanna aamma Sermitsiaq.AG-mut siusinnerusukkut oqaatiginikuuaa.