Kommunimi pisortaq isornartorsiuisoqareersoq: Tatigineqaqqilernissamut annertuumik suliassaqarpugut
Kommunimi pisortaanerup annertuumik isornartorsiuisoqareersoq oqaatigaa, sulisunut tatiginnilluni.
Ingerlatsisimanermik misissuisimanerup takutippaa, Kommuneqarfik Sermersuumi inissaqartitsiniarnermik ingerlatsisoqarsimanerani tukattupilussuarmik sumiginnaallunilu ingerlatsisoqarsimasoq.
Kommunimi pisortaanerup Ole Jakobsenip, siorna ukiakkut pisortaanertut sulilertup maanna oqaatigaa, ullumikkut sulisuusunut tatiginnilluinnarluni, aamma ingerlatsivimmut tatiginnittoqaqqilernissaa sulissutigineqartoq.
- Ineqarneq pillugu suliami akuusimasut maanna kommunimi sulinngillat. Innuttaasunit tatigineqarnitta pilerseqqinnissaanut annertuumik suliassaqartugut qularnanngilaq. Qujanartumilli sulisut pikkorissut kommunimi sulipput, taakku ullut tamaasa suliartortarput innuttaasunut sullissilluarusullutik, Ole Jakobsen kommunip nittartagaatigut oqarpoq.
Iluarsaassisoqartoq
Nalunaarutigineqartoq naapertorlugu, ajornartorsiutit arlallit nalunaarusiami saqqummiunneqarsimasut aaqqiissuteqarfigineqareersimapput, allalli aaaqqiissuteqarfiginiarlugit suli suliarineqarput:
- Ineqarnermut tunngatillugu suliassaqarfiup ingerlanneqarsimaneranik misissuinerit qangarnilereerput, taamaammallu isornartorsiutigineqartut kommunimiit suussuserneqareerput iluarsineqarlutillu, isornartorsiutigineqartullu allat aamma iluarsineqaleruttorlutik, Kommuneqarfik Sermersooq allappoq.
Ingerlatsivillu suliassaqaqaaq. Misissuisimasup ilaatigut oqaatigisimavaa, inissianik 400-ngajannik amerlassusilinnik piffissami sivisuumi attartornissaq eqqarsaatigalugu aqqaneq-marlunnik isumaqatigiissuteqartoqarsimasoq. Attartornissamik isumaqatigiissutit aningaasaliissuteqartartunut iluaqutaalluartussasut oqaatigineqarsimapput, taakkulu arlaannaalluunniit suliariumannittussarsiuuneqarsimanatik.
Akiliisinnaassuseqarneq qularutigineqartoq
Tamatuma saniatigut attartornissamik isumaqatigiissutit atorunnaarpata, inissiarpassuarni attartortut qanoq pineqarnissaannik pilersaaruteqartoqanngilaq.
Misissuisimasup tamatuma saniatigut illorfimmik ineriartortitseqatigiiffik Siorarsiorfik - Nuuk City Development annertuunik amigaateqartoq oqaatigaa, misissuisimasup ilaatigut qularutiginerarpaa, Kommuneqarfik Sermersooq atuarfissamut nutaamut 200 aamma 250 millioner koruunit akornanniittunik akiliuteqarnissamut akissaqanersoq. Aningaasat misissuisimasoq naapertorlugu, atuarfissaq ukiumi aggersumi naammassineqarpat tunniunneqartussaapput.