Kommuni: Inuusuttut 18-iliineqanngitsut tamarmik akeqanngitsumik timersorsinnaalerput

Qeqqata Kommuniani meeqqat inuusuttullu 18-it inorlugit ukiullit timersoqatigiiffinnut ilaasortanngornermi ilaasortaanermut akiliuteqartarunnaassapput. Inuusuttut imigassartorunnaartinniarlugit, tupatorunnaartinniarlugit aanngajaarniutitorunnaarsinniarlugillu timersoqatigiiffinnut ilaasortanngorneq kommunimit akilerneqartalissaaq.

Qeqqata Kommunia Islandimit, meeqqat inuusuttullu siusissukkut aallartillutik timersortalernermikkut peqatiminnut atassuteqarluarnissamut peqqinnarnerusumillu inooriaaseqarnissamut periarfissagissaarnerunerannik uppernarsaasimasumit isumassarsisinneqarsimavoq.

- Pissutsillu aamma takutippaat ilaqutariit arlariinnik timersortartunik meerartallit timersoqatigiiffinnut meerartaminnik ilaasortaatitaqarnissaminnut aporfeqartartut, angajoqqaat ilai timersoqatigiiffinnut ilaasortaanermut akiliinissaminnut akissaqarneq ajoramik. Tamanna ajornartorsiut qimassavarput – meeqqat inuusuttullu akeqanngitsumik timersorsinnaatitaassapput, kommuni tusagassiorfinnut nalunaaruteqarnermi ilisimatitsivoq.

Ukioq manna aallarnerfigalugu meeqqat inuusuttullu 18-liineqanngitsut timersoqatigiiffinnut akeqanngitsumik ilaasortaasinnaapput. Qeqqata Kommuniata meeqqat inuusuttullu 18-liineqanngitsut timersoqatigiiffinnut ilaasortaanerat akilertassavaa, inuiaqatigiinnut iliuuseqaqataanerattut isigineqassalluni.

Inuiaqatigiinnut sullissinissaq piumasaqaataasoq

Kommunmiittaaq timersortartut 14-leereersimasut unammiuaarnernut pissartanngorniunnernullu peqataanissamut angalanermut tapiiffigineqassagunik inuiaqatigiinnut arlaatigut akisussaaffilerneqarput.

Assersuutigalugu suliniutaasinnaasut tassaasinnaapput, illoqarfimmi pinngortitamiluunniit saligaatsuutitsineq, meeqqeriviit eqqaannik, kommunip aaqqissuussaata kiisalu utoqqaat angerlarsimaffiini aputaajaaneq il.il., tusagassiorfinnut nalunaarummi allassimavoq.

Powered by Labrador CMS