mittarfiit
Kommuni tatiginnikkunnaarnermik nalunaaruteqarniartoq
Qeqqata Kommuniani kommunalbestyrelsip Inatsisartut Naalakkersuisulli Kangerlussuup mittarfianik atorunnaarsinneqarneranik kinguneqarsinnaasumik mittarfiliortitsinissamik pilersaarutaat assut pakatsissutigaat. Kangerlussuarmi mittarfik matuneqassangaluarpat kommunimut takornariaqarnermulli annertuumik kingunerluuteqarsinnaavoq.
Qeqqata Kommuniani kommunalbestyrelsi tamakkiisoq Inatsisartunut Naalakkersuisunulli tatiginnikkunnaarnermik nalunaaruteqarniarpoq.
Tamanna kommunalbestyrelsip ullormut oqaluuserisaata eqikkarneqarnerani allassimavoq.
- Inuiaqatigiinnut kingunersinnaasaanik naatsorsuinernut akisussaaffeqannginneq, nutaanik mittarfiliortiternikkut Kalaallit Nunaata aporaaffilersorneratigut, nunat tamalaat akornanni mittarfiit aalajaannerannut naammassinninngilluinnartoq, Kalaallit Nunaata aningaasaqarnikkut nammassinnaanngisaanik, aammalu ullumikkut allanit nallerneqarsinnaanngitsumik pitsaasumillu inissisimanerit eqqarsaatigineqannginnerat pillugit Illersorneqarsinnaanngitsumik Inatsisartut Naalakkersuisullu iliuuseqarnerat pillugu kommunalbestyrelsi tamakkiisoq tatiginnikkunnaarnermik nalunaaruteqassasoq suleqatigiit innersuussutigivaat, imaqarniliami paasissutissiarineqarpoq.
Atuaruk: Mittarfiit nutaassat aningaasaqarnikkut eqquinerlussinnaasut Qeqqatamit ernumagineqarpoq
Kaammattuut: Kangerlussuaq matunagu
Kangerlussuup ammatiinnarneqarnissaa kommunalbestyrelsimit naatsorsuutigineqarpoq, taamaakkaluartoq kommuni Air Greenlandimit paasitinneqarsimavoq Ilulissani, Nuummi Qaqortumilu mittarfiit atulerpata, nunaqarfik matuneqassasoq.
Qeqqata Kommuniata 2015-imili sulissutigivaa, Kangerlussuarmi nutarsaanissamut pisariaqartitsineq pillugu paasissutissanik eqqortunik innuttaasunut saqqummertoqarnissaa. Kangerlussuup siunissaanut periarfissanik misissueqqissaartussanik Namminersorlutik Oqartussat Kommunillu akornanni suleqatigiissitaliortoqarnikuuvoq. Tamatumali kingorna mittarfeqarfinnut ilutsip allanguutigisaanik inuiaqatigiinnut aningaasaqarnikkut kingunerisinnaasai aamma Namminersorlutik Oqartussanit suliarineqarluni.
- Taamaattorli malunnarluarpoq, Kangerlussuup mittarfia piutillugu, suut piusinnaanersut Kalaallit Airports A/S misissuiffigisimanngikkai. Kangerlussuaq pillugu Naalakkersuisut nalunaarutigisaannut killormorluinnaq ittut aammalu Kangerlussuup siunissaanut suleqatigiissitap sulineranut killormorluinnaq isumaqarnarpoq, imaqarniliami allassimavoq.
Atuaruk: Mittarfiulaaginnartoqarsinnaanngilaq
Angalaneq akisunerulissaaq
Mittarfinnut ilutsit nutaat kingunerisinnaasai Qeqqata Kommunianit ersarissutut inerniliiffigineqartut, Qeqqata Kommuniata Allaffeqarfiata inerniliuppaa.
- Tamatuma kingunerissavaa, Qeqqata Kommuniata avatani mittarfinnut nutaanut nunatta karsiata aningaasaatai killeqartut atorneqassasut. Aammattaaq kingunerissavaa, Kangerlussuaq pingaarnertut mittarfittut ingerlaannassanngippat, nunap immikkoortuani timmisartuussineq akisunerulerlunilu ajornarnerulissasoq, Qeqqata Kommiunia allappoq.
Aamma atuaruk: Misissuineq: Mittarfiit nutaat inuiaqatigiinnut aningaasanik sipaaruteqartitsissapput
Kangerlussuarmilu takornarialerineq ineriartorfiulluartoq annertuumik kingunerlutitsisinnaanera, suliamik saqqummiinnermi aammattaaq tikkuarneqarpoq. Tamannalu kommunimut mittarfiliornialikkersaarnermi ajornikutut inissimalertussatut ernumassuteqartumut aamma sunniuteqassaaq.