Kommuni Tasiilami piterareersoq timmisartumik attartorluni Tasiilaliartitsisoq
Tasiilami sakkortuumik piterarnerata kingorna sapaatip-akunnera qaangiuttoq kommunimi sulisut Air Greenlandip timmisartuutaanut ilaallutik suli Tunumukarsinnaasimanngillat. Taamaammat kommuni timmisartumik ataatsimik nammineq attartorsimavoq.
Pingasunngornermi timmisartoq King Air attartugaq Nuummiit Kulusummut
timmisartuussitinneqassaaq. Kommuneqarfik Sermersooq timmisartumik King Air-imik attartorsimavoq, sulisut timmisartunut nalinginnaasunut ilaatinniarneqarnerat iluatsinneqarsimanngimmat. Piterartoqarneraniit Air Greenlandip timmisartuutai pingasut aallarfissaat taamaatiinnarneqarsimammata.
- Timmisartuussinermik attartorneq annertuumik aningaasartuuteqarfiuvoq, kisiannili maanna Air Greenlandimiit sullinneqarneq taamatut iluseqartillugu allanik periarfissaqartutut misigisimanngilagut. Ukiunnginnerani anorersuup ajoqusigai iluarsaattariaqarpagut. Taamaanngippat innuttaasut angerlarsimaffissaqanngillat, borgmesteri Avaaraq Olsen erseqqissaavoq.
Sanaartornermut immikkoortortaqarfimmi pisortap illoqarfimmukarluni ajoqusesimasunik aniliillunilu atortussanik inniminniinissaa kommunimut pingaaruteqarpoq, ukiortinnagumi ajoqusersimasut iluarsaanneqartariaqarmata.
Sulisut suli amerlanerusut aallartinneqarniartut
Kommunimit timmisartumik attartorneq qanoq akeqassanersoq suli paasineqanngilaq, pisiortortarnermulli pisortap naatsorsuutigaa, attartorneq 120.000 koruunit missaannik akeqassasoq.
Sulisunik Tunumukartitsiniarnermi ajornartorsiut nutaajunngilaq.
Kommuneqarfik Sermersuumi ingerlatsivinni tamanit nalunaarutigineqarsimavoq, sulisunik ukioq-manna Tunumukartitsiniartarneq ajornartarsimasoq, tamatumalu kinguneranik suliniutit kinguartinneqarlutilluunniit taamaatiinnarneqartarsimasut oqaatigineqarluni.
-Sulisutta apuunnissamut periarfissaqannginnerat peqqutigalugu innuttaasunik kiffartuussinerput ajornerulersoq misigalugu nuanniittorujussuuvoq. Tunumi silarlukulanera paasilluarparput, tamatumali peqatigisaanik Tasiilaq piaaraluni tunulliunneqartartoq misigisimavarput, Avaaraq Olsen oqarpoq. Borgmesteri pingasunngornermi timmisartumut attartukkamut ilaalluni Tunuliaqataassaaq.
Timmisartoq ilaasunut arfinilinnut inissaqarpoq, kommunimiillu Sermitsiaq.AG-mut ilisimatitsissutigineqarpoq, inissat sulisunut amerlanerusunut siusinnerusukkut aallarsinnaasimanngitsunut tunniunneqassasut.