Kommuni Qeqertalimmi inissititertoqartoq
Ane Hansen Kommuni Qeqertalimmilu kommunalbestyrelsi ukiuni tulliuttuni sisamani suleqatigiinnissamut isumaqatigiissuteqarput. Aqutseriaaseq nutaaq qinigaaffimmi kingullermi atuutsinneqalersimasoq ingerlatiinnarneqassasoq oqaatigineqarpoq.
Qinersinermut ullut tyvet qaangiuttut Kommuni Qeqertalimmi suleqatigiinnissamut isumaqatigiissut inissinneqarpoq. Ane Hansen borgmesteritut ingerlaannassaaq, parteeqataa Frantz Lundblad borgmesterip tulliatut atuutilersoq, Aqqa Samuelsen Siumumeersoq borgmesterip tulliata appaatut atuutilerpoq.
Siammasissumik suleqatigiinnissaq kommunalbestyrelsimi ukiuni sisamani aggersuni sulinissaq pillugu isumaqatigiissummi tunngavigineqarpoq.
Partiit sisamaasut IA, Siumut, Demokraatit Atassullu 2021-2025-imi anguniagassat pillugit siammasissumik isumaqatigiissuteqarsimapput.
Tamarmik peqataatinneqartut
Kommunalbestyrelsimi siammasissumik anguniagassanik siunniussaqarnermi suliniutit ersarissut ukiuni tulliuttuni sisamani anguniarneqarnissat qulakkerneqarpoq tamannalu tamatta nuannarutigaarput, IA-p gruppiani siulittaasoq borgmesterimullu tullersorti Frantz Lundblad tusagassiorfinnut nalunaaruteqarnermi oqarpoq.
Kommunalbestyrelsi isumaqatigiissuteqarnikkut aqutseriaatsimik nutaamik kommunip aallartereersimasaanik ingerlatitseqqinnissamik naammassinninnissamillu qulakkeerinnippoq.
- Taamaasillunilu Kommune Qeqertalimmi aqutseriatip nutaap pisariittulu kinaassutsitsinut
naleqquttup, kulturitsinnut pingartitsisup, nunarsuarmioqataanermillu inissaqartitsiup
inerisaqqinneqarluni ingerlaannarnissaa qulakkerneqarpoq, tusagassiorfinnut nalunaaruteqarnermi oqaatigineqarpoq.
Maajip aallartinnerani ataatsimiittoqassasoq
Innuttaasunik qanimut peqataasitsinermik pingartitsineq, innuttaasunik pitsaasumik
kiffartuussinermik siunertaqartoq, inuutissarsiutinik takornariaqarnermillu inerisaanissamut
pitsaasumik aqqutissiuinerit, inissaqarnikkut pitsangorsaanissat siunniunneqarlutik tamanik
isumaqatiissutigineqarput, borgmesterip tullia ilisimatitsivoq.
IA kommunalbestyrelsimi 15-inik ilaasortaqartumi amerlanerussuteqarluarluni qulingiluanik ilaasortaatitaqarpoq. Atassut Demokraatillu tamarmik ataatsimik ilaasortaatitaqartut, Siumut sisamanik ilaasortaatitaqarpoq.
Kommune Qeqertalimmi kommunalbestyrelsi 2021-mi maajip pingajuani inissititerluni ataatsimiissaaq.