Kommuni Qeqertalik imigassanik nioqquteqarnermut inerteqquteqarallarnissamik aamma qinnuteqarpoq
Kommuni alla imigassanik aalakoornartortalinnik nioqquteqarnissamut aamma inerteqquteqalerpoq.
Nunami kommuninit tallimaasunit sisamat imigassanik aalakoornartortalinnik nioqquteqarnissamut maanna inerteqquteqalerput.
Namminersorlutik Oqartussat tusagassiorfinnut nalunaateqarlutik ilisimatitsissutigaat, Kommuni Qeqertalimmi kommunalbestyrelse immikkut ittumik ataatsimiissimasoq, tassanilu aalajangiisoqarsimas, Kommuni Qeqertalimmi illoqarfiit nunaqarfiillu tamarmik imigassanik aalakoornartortalinnik nioqquteqarnerup imigassartortitsisarnermullu inerteqquteqarallarnissamik Naalakkersuisunut piumasaqartoqassasoq.
Inerteqquteqarneq 2022-mi januaarip 27-ani unnuap-qeqqaniit februaarip qulingiluaani unnuap-qeqqata tunaanut atuutissaaq.
- Qinnuteqaatit akuerineqarput unnuap qeqqaniillu 9. februar 2022 ilanngullugu atuutilissallutik, Namminersorlutik Oqartussat allapput.
Naalakkersuisut ilisimatitsissutigaat, peqqinnissaqarfimmi politiinilu nukinnik atuingaatsiartoqartarnera eqqarsaatigalugu taamatut aalajangiisoqarsimasoq.
Imigassamik inerteqquteqarnikkut imigassartorpallaartoqartarnerata annikillisinneqarnissaa oqatussanit tunngavilersuutigineqarpoq.
- Fiistertarneq amerlanertigut Peqqinnissaqarfimmi aamma politiini nukinnik atuingaatsiartoqartarpoq suliassanillu arlalinnik kinguneqartarluni, taakkulu imigassartorpallaarnermik tunngaveqartarlutik, Namminersorlutik Oqartussat allapput.
- Tamanna tunngavigalugu aamma tuniluunnerup annertunera pissutigalugu, Naalakkersuisut Kommuni Qeqertalimmi kommunalbestyrelsip qinnuteqaataa akuersissutiginiarlugu aalajangerput, nalunnaarummi allassimavoq.
Naalakkersuisut sapaatip-akunnerani matumani siusinnerusukkut nalunaarutigaat, imigassamik aalakoornartortalimmik unnukkut quliniit ullaakkut tallimat tungaanut sassaallertarnerup inerteqqutigineqarnera februaarip allaqqaataata tungaanut sivitsorneqassasoq. Tamanna atuutissaaq Kommuni Qeqertalimmi, Kommuneqarfik Sermersuumi Kommunimilu Kujallermi.
Taamaalilluni Avannaata Kommuni kisimi imigassamik aalakoornartortalimmik tunisaqarnissamut suli ammatitsivoq.