Kommuni qarasaasiatigut tiguagaaqqavoq
Kommune Kujallermi qarasaasiatigut tiguarneqareernermi kingorna innuttaasunik sullissisinnaanera killeqarpoq kiisalu ikiorsiissutinik tunniussisoqarsinnaanani. Kommunip avataanit sullissisuisa ajoqqutaasoq aaqqinniarlugu suliniuteqaleruttorput.
Kommune Kujallermi serverit hackerneqarsimasut arfininngormat paasineqarpoq.
Kommuni taama eqqorneqareernermi kingorna innuttaasunik sullissiniarnera kipiluttunartoq, kommuunillu avataanit sullissisuisa maanna ajoqqutaasoq aaqqinniarlugu suliniuteqaleruttortut, Kommune Kujallermi paasissutissiinermut pisortaq Salome Hansen, Sermitsiaq.AG-mut ilisimatitsivoq.
Ikiorsiissutit tunniunneqarsinnaanngikkallarput
Computerit tiguarneqaqqanerat pissutaalluni innutaasunut sullissiniarneq kipiluttunarallarpoq, taamaammat ikiorsiissutit assigiinngitsut tunniunneqarsinnaanngikkallarput.
- Ikiorsiissutit, siusinaartumik pensionisiat, meeqqanut akilersuutit kommunimiillu akilersuutit allat tunniunneqarsinnaanngikkallarput, nalunaarutigineqarpoq.
Pisoq pillugu kommuni politiinut nalunaarutigineqareerpoq. Qaqugu serverit atorneqaqqilersinnaanissaat ilisimaneqanngikkallarpoq.
Internettikkut saassussinerit arlallit
Kommunimut qanoq saassussisoqarsimanersoq ilisimatitsissutigineqanngilaq. Royal Greenland aamma napparsimaveqarfiit nittartakkatsigut eqqorneqaqqammerput. Napparsimaveqarfik nittartakkatigut saassunneqarmat Doktor.gl atorneqarsinnaajunnaarpoq aamma peqqinnissaqarfimmi e-mailinik tigusiniarneq ajornartorsiutigineqarpoq.
Royal Greenland assingusumik saassunneqarmat aningaasarsiaqartitsineq ilaatigut eqqorneqarpoq.