Kommuni Nuummi immikkut upalungaarsimanermik pilersitsivoq
Innaallagissamik pilersuinerup aalaakaannginnera pissutaalluni kommunip immikkoortortaqarfii ilungersunartorsiorput. Taamaammallu kommunip immikkoortortaqarfinni assigiinngitsuni immikkut ittumik upalungaarsimanermik pilersitsisoqartoq, politiit tusagassiuutinut nalunaarumminni taama allapput.
Nuummi ataasinngornerup unnukkuaniit marlunngornermi ualeq tikillugu innaallagiaqanngilaq. Oqarasuaatinut attaveqaatit telemullu allat atassuteqaatit sarfaarunnermi atassutaarupput. Innuttaasut politiinut qatserisartunut peqqinnissaqarfimmullu attaveqarsinnaajunnaarlutik.
Innaallagiaq suli aalaakaanngimmat arlaatigut ajutoortoqassagaluarpat innuttaasut oqartussanut saaffiginnipallassinnaaniassammata Kommuneqarfik Sermersooq maanna immikkut ulapungaarsimanermik pilersitsivoq.
- Ikuallattoqalissagaluarput upalungaarsimaneq maannamut nalinginnarmik ingerlanneqassaaq. Innaallagiarlu qameqqissappat taava biilit pingasut illoqarfimmi angalaalissapput, taamaasilluni innuttaasut qatserisartut unitsinnerisigut qatserisartunut attaveqarsinnaaniassammata, upalungaarsimanermik suliaqartut paasissutissiipput.
Utoqqarnut innarluutilinnullu ikiuineq
Innaallagiaqartillugu angerlarsimaffinni ikiortit nalinginnarmik orniguttassapput. Innaallagiaarunneranilu angerlarsimaffinni ikiortit upalungaarsimanermi malittarisassat malilissavaat.
- Utoqqaat innarluutillillu kiassarnermik imermilluunniit amigaateqarunik taava Kommuneqarfik Sermersooq uunga attavigissavaat 321016. Oqarasuaat ulloq unnuarlu sianerfigineqarsinnaavoq. Oqarasuaatit ajortissappata taava innuttaasut kommunimut inunnut sullissivimmut saaffiginnikkiartorsinnaajumaarput, taama oqartussat nalunaaruteqarput.
Meeqqanut ilaqutariinnullu immikkoortortaqarfik ulloq unnuarlu ammassaaq
Inuusuttut immikkut ikiortariallit Kommuneqarfik Sermersuup meeqqanut ilaqutariinullu immikkoortortaqarfianut attaveqarsinnaapput. Ingerlatsivik ulloq unnuarlu sisamanik sulisoqassaaq.
- Ornigulluni saaffiginnittoqarsinnaanngippat taava ukua sianerfigineqarsinnaapput: 321015, 555731 imaluunniit 529774. Oqarasuaatsit taakkua ulloq unnuarlu sianerfigineqarsinnaasapput. Oqarasuaatsillu ajortissappata Imaneq 20-imut ulluinnarni ammasarfiinni saaffiginnikkiartortoqarsinnaavoq.
Atuarfiit meeqqeriviillu matoqqapput
Innaallagiaqartillu atuarfiit meeqqeriviillu nalinginnarmik ammasassapput. Atuarfiit meeqqeriviillu meeqqanik paarsisinnaapput angajoqqaat pinartumi suliffeqartillugit.
- Neqeroorut taamaat pinartoqavitsillugu atorneqarnissaa kaammattuutigaarput. Sivisuumik innaallagiaqartinnagu kiassarneq eqqiluisaarnerlu ilungersunarsinnaasarmata, kommune paasissutissiivoq.
Kommuneqarfik Sermersuummi saaffiginnittarfiit nalinginnarmik innaallagiaqartillugu ammasassapput innaallagiaqartinnagulu matoqqasassallutik.