Kommuni Kujalliup mittarfissap naannerunissaa akuersaanngilaa
Kommuni Kujallermi borgmesterip Qaqortumi mittarfissap aallaqqaammut 1499 miiteriusussatut pilersaarutaasup naanninngortinniarneqarnera akerlilerpaa.
Sapaatip akunnerani kingullermi saqqummiunneqarpoq, Kalaallit Airportsip sulissutigigaa, aningaasaqarneq imminut ataqatigiissinniarlugu Qaqortumi mittarfissap naannerulersinneqarnissaa.
Ilaatigut mittarfissap naannerulersinneqarsinnaanera timmisartoqarfiullu illutassaasa mikinerulersinneqarsinnaanerat misissorneqarniarpoq. Mittarfissaq aallaqqaammut 1499 miiterisut takitiginissaa pilersaarutaasimavoq.
Kommunk Kujallermi borgmesterip Kiista P. Isaksenip mittarfissap naannerulersinniarneqarnera sakkortuumik akerlilerpaa, kommuni nittartakkamigut ilisimatitsivoq.
Pilersaarutinik allannguineq akuersaarneqarsinnaanngitsoq
Borgmesterip pilersaarutinik allannguiniarneq akuersaanngilaa, piumasaralugulu Inatsisartut suliassaq pillugu akuerisimasaat naammassineqassasoq:
- Inatsisartut Qaqortumi mittarfiliornissaq akuersissutigimmassut mittarfik 1500 meterinik takissuseqartoq akuersissutigineqarpoq, taamaattumik mittarfissap naalineqarnissaanik oqariartuuteqarneq pissusimisuunngilaq akuerineqarsinnaananilu.
- Tamanna pillugu Attaveqaqatigiinnermut Naalakkersuisoq piffissami aggersumi ataatsimeeqatiseraarput, ataatsimiinnissatsinnilu oqaloqatigiissutissaqarluaratta naapinnissaq qilanaarivara, Kiista P. Isaksen oqarpoq.
Ataatsimiititaliami siulittaasumit taperserneqartoq
Kmmune Kujallermi Inuussutissarsiornermut Suliffeqarnermullu Ataatsimiititaliap siulittaasuamit Simon Simonsenimit taperserneqarpoq:
- Qaqortumi mittarfissamut ukiorpassuarni utaqqisimasatsinnut utaqqeqqissinnaanngilagut, Simon Simonsen oqarpoq.
Borgmeteri septembarip qaammataata naanerani Nuummiissaaq Naalakkersuisunik Inatsisartunilu ilaasortanik mittarfiliornissaq pillugu ataatsimeeqateqassalluni.