Kommuni isornartorsiuisoq - angut inuusuttoq skizofreneeqartoq suli unnuisarfimmiittartoq

Sermitsiaq.AG-mit apersuisoqarmat, innuttaasoq ataaseq angerlarsimaffeqannginnerminut nappaateqarnerminullu atatillugu kommunimit ikiorserneqarnissamik neqeroorfigineqarsimanngitsoq isumaqarnarsisimavoq.

- Tusagassiorfiit taamak kukkuneqartigisunik ilanngutassiisarnerat innuttaasunut iluaqutaanngivippoq.

Inge Olsvig Brandt Kommuneqarfik Sermersuumi suliffeqarnermut isumaginninnermullu ataatsimiititami siulittaasoq taamatut isornartorsiuivoq.

Tusagassiivimmit kommuni attavigineqarsimavoq, tassani paasiniarlugu Suliffeqaernermut Isumaginninnermullu Ingerlatsivimmit apersuisimaneq sorleq pineqarnersoq, minnerunngitsumillu qanoq kukkusoqarsimanersoq paaserusullugu.

Kommunimit ilisimatitsissutigineqarpoq, ilanngutassiaq isornartorsiorneqartoq tassaasoq: en oplyser, at det drejer sig om artiklen: Inuusuttoq skizofreneqartorlu unnuisarfimmiittartoq: - Qangalili ikiorserneqartussaangaluarpunga.

Tigulaakkat pingasut

Ilanngutassiaq isornartorsiorneqartoq sapaatip-akunnerata ataatsip matuma siornatigut saqqummiunneqarpoq.

Tassunga atatillugu Sermitsiaq.AG-mit Karl-Peter Jakobsen skizofreqartoq saaffigineqaqqissimavoq. Taassuma inuttut inissisimanini pillugu paasissutissat Sermitsiaq.AG-mit takuneqarsinnaasut akuerisimavaa.

Kommuneqarfik Sermersuumit tamanna tunngavigalugu pineqartumut atatillugu allaaserineqarsimasunit tigulaakkat pingasut, Suliffeqarnermut Isumaginninnermullu Ingerlatsivimmit suliamut attuumassuteqartutut isigineqartut nassiunneqarsimapput. Oqaaseqatigiit nassiunneqartut paasinarpallaanngillat. (...) atorlugu nassuiaasersorneqarsimagamik.

Tigulaagaq siulleq naapertorlugu, Karl-Peter Jakobsen 2020-mi oktobarip qaammataanili Paamiuni inissaanik tunineqarsimavoq.

Tigulaakkap aappaani allassimavoq: Karl-Peter Jakobsen angerlarsimaffeqannginnami (...), initaarnissamut ikiorneqarusulluni Nuummi oqaloqatiginninnissamut piffissamik inniminniisimasoq. Pineqartumulli atatillugu allattorsimasut misissuataaraanni takuneqarsinnaavoq, pineqartoq Paamiuni najugaqartoq, Paamiunilu 2020-mi oktobarip qaammataani (...) tunineqarsimasoq.

Matuersaatini utertissimagaa

Ilanngullugu allassimavoq:

- Oqaloqatigineqarami maani Nuummi inissaminik neqeroorfigineqarnissani kissaatigisimavaa. Nuummi sumi najugaqarnersoq aperineqarsimavoq. Ilisimatitsissutigisimavaalu ajamini najugaqarluni ullualuillu matuma siornatigut Nuummut tikissimalluni.

- Karl-Peter Paamiuni najugaqarmat, maani Nuummi inissaanik neqeroorfigisinnaanngikkipput ilisimatinneqarsimammat, maanngaanik iliuuseqarsinnaanngilagut, inissisimaffiali paasisinnaavarput.

- Aamma ilisimatitsissutigisimavaa, klubbimimi iniminut matuersaat INI A/S-imut utertitsissimallugu.

Ukiuni marlungajanni ikiorserneqarsimanngitsoq

Tigulaakkat pingajuanni kingulersaannilu ilisimatitsissutigineqarpoq, Karl-Peter Jakobsen 2021-mi apriilip qaammataani Nuummut nuussimasoq.

Sermitsiaq.AG-mit taamaalilluni paasineqarpoq, Karl-Peter Jakobsen 2020-mi oktobarip qaammataani Paamiuni inissaanik tunineqarsimasoq. 2021-mi apriilip qaammataani Nuummut nuussimavoq, taamalu ilanngutassiami atuarneqarsinnaasutut ukiuni pingasuni unnuisarfimmiittarsimanngilaq.

Sermitsiaq.AG-mit kukkuneq ajuusaarutigineqarpoq, ilanngutassiarlu manna aqqutigalugu kukkuneq iluarsiiffigineqarluni.

Taamaakkaluartoq - Suliffeqarnermut Isumaginninnermullu Ingerlatsivimmit paasissutissat pissarsiarineqartut naapertorlugit - Karl-Peter Jakobsen 2021-mi februaarip qaammataanili pisariaqartitaminut ikiorserneqarsimanngitsoq inerniliunneqarsinnaavoq.

Kommunimit paasissutissat nutaat

Tassa ukiuni marlungajanni ikiorserneqarsimanngilaq. Ilanngutassialli matuma saqqummiutinngitsiarnerani Kommuneqarfik Sermersuumit lanngutassiamut malitseqartitsilluni, sullissisimanermit uppernarsaatit aalajangersimasut nassiunneqarput.

Taakkunani atuarneqarsinnaavoq, Karl-Peter najugaqaqatigiiffimmi inissaanik kommunimit 2021-mi maajip qaammataani neqeroorfigineqarsimasoq, tassungali taarsiullugu Arsummukarnissani aalajangersimagaa.

Ilanngullugu allassimavoq:

- Kommunimit suliamik nangitsilluta suliaqaqqinnginnitsinni nakorsamit uppernarsaatinik ukiarli pissarsiniartarsimavugut.

Kommunimit aamma allapput, Karl-Peter illoqarfimmiit aallarniarluni akuttunngitsumik oqaaseqartartoq.

- Karl-Peter'p 2022-mi martsip qaammataani unnuisarfimmut oqaatigisimavaa, Paamiunut nuunniarluni, kommunimit aaqqissuisoqarfimmut allapput.

Siuliani pineqartumut atatillugu uppernarsaammik Sermitsiaq.AG-mit takunnittoqarsimanngilaq, - kommunili naapertorlugu - tamatuma malitsigisaanik sullissineq naammassiuminaatsinneqarpoq Karl-Peterlu utaqqisut allattorsimaffiannut inissikkuminaatsinneqarluni:

Kommuneqarfik Sermersuumit allapput: Kommuni qujanartumik Karl-Peter Peqqinnissaqarfimmiulu sulisut peqatigalugit suliamik ingerlatseqqilersimavoq.

Karl-Peter utaqqiissaa unnuisarfimmi suli sinittarallassaaq.