Kommuni inissiaatileqatigiiffillu attartortunit naammaginninngitsunit politiinut tunniunneqartut

Nuummi attartortoqarpoq eqimattanik Kommuneqarfik Sermersuumit aamma kommunip inissiaatileqatigiiffianit uukapaatinneqarsimasutut misigisimasunik.

Attartortut naapertorlugit kommuni inissiaatileqatigiiffillu peqquserluuteqarsimapput, inissianik attartornermut isumaqatigiissuteqarnermut atatillugu pissutsinik qitiusunik paasissutissiisimannginnermikkut.

Attaartut assersuutigalugu ilisimatinneqarsimanngillat, ineqarnermut akiliutitik ukiumut 3 procentinik qaffattalerumaartut, kommunilu ineqarnermut akiliutit angissusaasa attartornermut peqqussummi maleruagassanut naapertuunnerinut ataqatigiissumik akissuteqanngilaq.

Attartortut kommunimik inissiaatileqatigiiffimmillu sakkortuumik alloriarlutik nalunaarutiginnittut arfineq-pingasuupput. Attartortut kinaassutsiminnik isertuussiumapput, Sermitsiaq.AG-milli kinaassusii ilisimaneqarlutik allagaatillu attartortunit politiinut nalunaarutiginninnermut peqatigitillugu nassiunneqarsimasut aamma takuneqarsimallutik.

Inissianut tunngasunik suliamut ilaasut

Inissiat attartortunit najugaqarfigineqartut inissianut tunngasunik suliamut ilaapput. Taamaattumik inissiat ingerlatseqatigiiffimmit namminersortumit, kommunimut inissianik attartortitsisimasumit, pigineqarput, taakkualu kommunimit attartortinneqarsimallutik.

Ingerlatseqatigiiffimmit namminersortumit piumasarineqarsimavoq, ineqarnermut akiliut, kommunimit akilerneqartartoq, ukiumut 3 procentinik qaffattassasoq, qaffaallu taanna aamma attartortunut tutsinneqassaaq.

Attartortut tassa isumaqarput, kommuni aamma Iserit attartornermut isumaqatigiissut pilersinneqarnerini ineqarnermut akiliutit qaffattarnissaat pillugu paasissutissiisimasariaqaraluartut.

Attartortut tamanna naammaginngilaat

Taakkua isumaqarput, ineqarnermut akiliutit qaffattarnissaat attartornermut isumaqatigiissummi siumoortumik paasissutissiissutigineqarsimasariaqaraluartoq. Ukiumut 3 procentinik qaffaasoqartarnissaa aamma ingerlatsinermut tapiissutit annertuut kommunip ineqarnermut akiliutinut tunniuttagai ilisimasaqarfigisimanngilaat.

Isumaqarput inissiat kvadratmeterinngorlugit angissusiinit inissiat angissuusinik inatsisini naatsorsueriaaseq malinneqarsimanngitsoq. Inissiat angissusii ineqarnermut akiliutinik aalajangersaanermut tunngaviusarput, kisianni inissiat angissutsimikkut iluarsiivigineqarlutik appartinneqarsimagaluartut, attartortut suli ineqarnermut akiliutinik taakkuninngarpiaq akiliuteqartarput.

Isumaqarput, kommuni ineqarnermut akiliutit attartornermut peqqussut naapertorlugu aalajangersarneqarsimanerannik misissuinissamut pisussaaffimminik sumiginnaasimasoq. Taamaattumik ineqarnermut akiliutit imaluunniit inissianut taarsigassarsinerit inatsisinik unioqqutitsinnginnerunersut ilisimaneqanngilaq.

- Taakkua isumaqarput, kommuni isumaqatigiissutinik kvadratmeterit amerlassusiinik nalornissuteqarfiusunik aalajangiusimanninnermigut soqutigisanik allanik iluaqusiiniartoq.

- Kommuni suliassamik suliarinninnissaminut pisussaaffeqarnerminik immikkut sumiginnaasimasoq isumaqarput.

- Attartut suliaq pillugu piffissami sivisuumi borgmesterimut kommunalbestyrelsimullu ilaasortanut attaveqarniartarsimagaluarput, iluatsissimanaguli.

- Attartornermut isumaqatigiissutitsinni imaluunniit initaarnissaq pillugu neqeroorutini aalajangersakkat immikkut pillugit allassimasoqanngilaq, taamaallaalli kommunip pisariaqartutut isumaqarfigilerpagu inissiamut allamut nuunnissamut piareersimassasugut, attartortut sinnerlugit oqaaseqartoq oqarpoq.

Tapiissutit appartinneqassasut

Ineqarnermut akiliutit ukiumut 3 procentinik qaffanneqartarnissaasa saniatigut attartortut atorfilittamit qanittukkut ilisimatinneqarsimapput, kommunip ineqarnermut akiliutinut tapiissutai ukiuni aggersuni ukiumut 2 aamma 4 procentit akornanni appartinneqartassasut.

Inissiaqarfimmi ineqarnermut akiliutinut kommunip tapiissutai attartortut ineqarnermut akiliutaasa affangajaannik amerlassuseqarput, tapiissutillu appartinneqarpata, attartortut ineqarnermut akiliutaat tassa qaffaqqissapput. Tamanna aamma paasissutissiissutigineqarsimasariaqaraluartoq attartortut isumaqarput.

Ajornartorsiut suli alla tassaavoq, inissiat kvadratmeterinngorlugit angissusilerneqarsimanerisa kukkusuunerannik attartortut kommunimut inissiaatileqatigiiffimmullu nassuerutiginnitsitsiniarsimagaluarnerat. Inissiat pissusiviusunit angininngorlugit naatsorsorneqarsimapput.

Inissiat angissusaat pillugu ukiuni arlalinni akerleriittoqareersorlu inissiat qanittukkut annertuumik annikillilerneqarput, taamaalillunilu inissiaq ataaseq siornatigut 141 kvadratmeterinik angissuseqarnerarneqarsimasoq maanna 114 kvadratmeterinik angissuseqartutut naatsorsorneqarsimalluni. Tamanna attartortunut ineqarnermut akiliutit allanngortinneqarnerannik malitseqarsimanngilaq. Tamanna attartortunit eqqumiigineqangaatsiarpoq, inatsisini allassimasoqarmat, inissiap angissusia ineqarnermut akiliutit naatsorsorneqarnerannut ilanngunneqassasoq.

Kommunip siamasinnerusumik misissuiffigineqarnissaa kissaatigigaat

Attartortut sinnerlugit oqaaseqartitaq nassuiaavoq, attartortunit suliaq ineqarnermut naammagittaalliuuteqartarfimmut, inissianik attartorneq pillugu naammagittaalliuutinik nalinginnaasumik isumaginnittartumut, tunniunneqarsimanngitsoq, ineqarnermut akiliutaannaanngitsut aammali kommunip siamasinnerusumik misissuiffigineqarnissaa attartortunit kissaatigineqarmat.

Tamatumunnga ilaatigut pissutaavoq, ingerlatseqatigiiffimmut namminersortumut inissianik sanaartortuusimasumut pisortanit taarsigassarsisitsisoqarsimanera. Pisortanit taarsigassarsisinnaassagaanni piumasaqaatit arlalissuit naammassineqarsimasussaapput, attartortullu isumaqarput suliaq qanimut misissorneqartariaqartoq:

- Soqutigisat suut isiginiarneqarsimanerat eqqumiigaarput – isumaqatigiissutini takusimasatsinni tamani, kisianni kommunip isumaqatigiissutinik taakkuninnga aalajangiusimanninnera eqqumiiginerpaavarput.

Iserit oqaaseqarusunngitsoq

- Kommunip isumaqatigiissut aallaqqaammulli neriorsuutigineqartunik malinninngitsoq aalajangiusumavaa. Kommuni 1485 kvadratmeterinik attartortitsisimavoq, kisianni taakkunannga taamaallaat 1136 kvadratmeterit najugaqarfigineqartussatut akuerisaasimapput, nalunaarutiginnittut sinnerlugit oqaaseqartitaq oqarpoq.

Iserip pisortaata Torben Kortegaardip suliaq oqaaseqarfigerusunngilaa. Taanna mailikkut allappoq, Iserit A/S-ip attartortunik suliat tigussaasut ataasiakkaat tusagassiuutinik oqaaseqarfigisanngikkai.

Sermitsiaq.AG Kommuneqarfik Sermersuumit suliamut oqaaseqartitsinissamik sulissuteqarpoq.