Nuummi utoqqaat illuinut inissinnissamut utaqqisut maannakkorpiaq 22-iupput. Kommuneqarfik Sermersuumi utoqqarnik sullissivimmi aqutsisoq, Arnannguaq Heilmann Christensen Sermitsiaq.AG-mut taama ilisimatitsivoq.

Utaqqisut kisitsisitigut nikerarput. Aammali utaqqisut tulleriiaaqqissaarlutik utaqqisuunngillat, tassa ulloq unnuarlu paaqqutarineqarnissamik pisariaqartitsinerpaat utoqqaat illui inissaqalertillugit, siulliullutik nuussinnaasaramik.

Nuummi utoqqaat illui marluusut, tassa Ippiarsuk aamma utoqqaat illuat, katillugit 78-nik inissaqarput, utoqqaat illuani qasuersaarfittut immikkoortortami inissat 14-it ilanngullugit. Taakku saniatigut puiguttortunut inissat 19-iupput.

Qinnuteqartup pisariaqartitai nalilersorneqartuaannarput

Vilhelmine Lorentzen, 92-inik ukiulik, utoqqaat illuanni qasuersaarfimmit angerlartinneqarsimanera Sermitsiaq.AG-mi sapaatip akunnerata siuliani allaaserineqarpoq. Nammineerluni, hjemmehjælpinit ikiorteqartarluni angerlarsimasinnaasoq nalilerneqarsimavoq. Ilaqutaasunit tamanna naammagineqarsimanngilaq, suliarlu pillugu naammagittaalliortoqarmat suliaq aallaqqaataaniit nalilersorneqarpoq.

- Kommuni nalilersuinissamut tunngaveqarpoq politikkikkut akuerineqarnikuusunik. Innuttaasoq utoqqaat illuanut inissinnissamik qinnuteqarpat, qasuersaarfimmulluunniit immikkoortortamut inissinneqarallarpat, ikiuutinik sunik pisariaqartitsinersoq tamatigut nalilersorneqartarpoq, utoqqarnut sullissinermi immikkoortortami pisortaq, Arnannguaq Heilmann Christensen nassuiaavoq.

Ikiuutit tassaasinnaapput passimmiut orlunermi kalerriisinnaasut, angerlarsimaffimmi ikiortit, imaluunniit ulloq unnuarlu paaqqinniffiusunut inissiineq.

Pisariaqartitsinerpaat siullinngortarput

Immikkoortortaqarfimmi pisortaq nassuiaavoq utoqqaat pisariaqartitsinerpaasut utaqqisuni siullinngortinneqartartut, siulliullutik utoqqaat illuinut inississinnaaniassammata.

- Pisariaqartitsinernik nalilersuisartut naliliinerat aallaavigalugu innuttaasut ulloq unnuarlu paaqqutarineqarnissamik pisariaqartitsinerpaat, utoqqaat illuini inissinnissamut siullinngortinneqartarput. Utoqqaat illuini inissaqartoqarnialeriartoq, nuutsitsisoqartarpoq, Arnannguaq Heilmann Christensen oqarpoq.

Innuttaasoq arlaatigut napparsimalersimappat, pisariaqartitsineraluunniit arlaatigut tassanngaannartumik annertusisimappat, nutaamik nalilersuisoqartarpoq, pineqartoq utaqqisuni siullernut ilanngutsinneqarsinnaaleqqullugu. Nalilersuinermi ilaqutaasut, pillorissaasup, paaqqutarinnittut, peqqinnissaqarfimmilu naliliinerit tunngavigineqartarput, taamatullu innuttaasup pisariaqartitai qulaajarneqartarlutik, Arnannguaq Heilmann Christensen Sermitsiaq.AG-mut ilisimatitsivoq.