Kommuneqarfik Sermersuumut isornartorsiuinerit imaaginnavipput - politikkeri ilaginnarneqarsimasutut misigisimavoq

Ingerlatsinermik misissuisoqarsimanerata takutippaa, Kommuneqarfik Sermersuumi ineqarnermut susassaqarfik ingerlanerluttoq. Politikkeri atorfilittanit borgmesterimillu ilaginnarneqarsimasutut misigisimavoq.

- Uanga immikkut ilisimasaqartuunngilanga. Atorfilittat suliaminnut ilisimasallit qanoq ilillutik mianersoqqusisimannginnerpat? Pissutsinut taamatut ittunut akuersaaginnartoqarneratigut pisooqataasorpassuaqarpoq, Inga Dora G. Markussen oqarpoq.

Kommunimi politikkerit arlallit kommunip ineqanermut tunngatillugu ingerlatsisimaneranik misissuisimaneq tamanut saqqummiunneqaqqammersoq atuaramikkut tupaallassimassaqaat. Nalunaarusiami ilaatigut isornartorsiorneqarput malittarisassanik unioqqutitsisimanerit arlallit, tukattumik ingerlatsisoqarsimanera aamma assersuummik kammalaatersorsimanermik takutitsisumik saqqummiussisoqarluni.

Kukkunersiuisimasup ilaatigut inerniliussimavaa, ineqarneq pillugu suliamut sammineqaqisumut atatillugu namminersortutut aningaasaliissuteqartartut ilaat Konkret konstaterer revisor blandt andet, at nogle private investorer har fået "qaqutigoortumik iluaqutigisaminik" kommunimik isumaqatigiissuteqarsimasoq.

Ilaatigut aamma atuarneqarsinnaavoq, kommunimi pisortap sanaartortussamut nunaminertamik tunniussinissamik ingerlatsivimmit aalajangiunneqarsimasoq allanngortissimagaa. Taamatut aalajangertoqarneratigut sanaartortussaq iluaquserneqarsimavoq, tamannalu allaganngorlugu tunngavilersorneqarsimanani. Sanaartortussaq aamma illut portussusissaattut akuerisaasimasunit portunerusunik sanaartornissamut immikkut akuerineqarsimavoq.

Kommunip illoqarfimmik ineriartortitseqatigiiffiutaa Siorarsiorfik - Nuuk City Development (NCD) taamatuttaaq nipilimmik isornartorsiorneqarpoq.

Halimik pisiaqarsimaneq apeqquserneqartoq

Nalunaarusiami atuarneqarsinnaavoq, NCD halimik 12,5 millioner koruuninik nalilimmik pisiaqaqquneqarsimasoq. Kommunimi pisortaq pisiaqaqqusisuusimavoq, kukkunersiuisorlu naapertorlugu, hali inummit "kommunimi pisortaasimasumik ingerlatseqatigiiffiullu siulersuisuini siulittaasuusimasumik qanimut niueqatigisartakkaminit" pisiarineqarsimalluni.

Kommuni ineqarnermut tunngatillugu suliami aningaasaliissuteqartartunut iluaqutaalluartunik attartornissamik isumaqatigiissuteqarsimanermi saniatigut, sanaartugassanut, aningaasaliissuteqartartut sanaartoriarlugit kommunimut attartortissimasaannut 130 millioner koruunit missaannik taarsigassarsisitsisimavoq.

Kukkunersiuisimasup tassunga atatillugu inerniliussimavaa, taarsigassarsisitsisimanerit taakku malittarisassat malinnagit tunniunneqarsimannguatsiartut, kommunilu malittarisassanik malinnittoqarsimanersoq pillugu misissuisimanngitsoq. Pisortanit taarsigassarsissagaanni attartorneq aalajangersimasunik aningaasartuuteqarfiusussaavoq, kukkunersiuisorlu naliliivoq tamanna pisimanngitsoq:

Pisortanit taarsigassarsiat akilerneqartussaasut

- Ullumikkut erniat annertussussaat eqqarsaatigalugit aamma attartortitsisup attartornissamik isumaqatigiissutit taamaatinneqarsinnaannginnerisa malitsigisaannik ajornartoorsinnaanerata annikillisimanera eqqarsaatigalugu, pisortanit taarsigassarsiarineqarsimasut akilerneqartussaapput (imaluunniit ineqarnermut akiliutit appartinneqartussaapput), tassa kommunip aalajangersakkamik tamatumannga atuinissaq aalajangissappagu, kukkunersiuisoq allappoq.

Siumumi politikkeri Inga Dora G. Markussen ingerlatsisimanerup misissuiffigineqarnissaanik piumasaqartuusimavoq, taanna misigisimanerarpoq atorfilittani borgmesterimillu ilaginnarneqarsimalluni.

Inga Dora G. Markussenip oqaluttuaraa, borgmesterip Charlotte Ludvigsenip (IA) ingerlatsisimanermik misissuisoqarnissaa pillugu isumassarsiamut peqataatinniarneqanerani sorsuuteqartariaqarsimalluni, kukkunersuisullumi kommunimi ajortoqavinneranik isumaqarnera uppernarsarpaa.

Politikkeri: Pisooqataasorpassuaqarpoq

- Uanga immikkut ilisimasaqartuunngilanga. Atorfilittat suliaminnut ilisimasallit qanoq ilillutik mianersoqqusisimannginnerpat? Pissutsinut taamatut ittunut akuersaaginnartoqarneratigut pisooqataasorpassuaqarpoq, Inga Dora G. Markussen oqarpoq.

Inga Dora G. Markussen ineqarnermut tunngatillugu suliami pineqartumi kommunip iliuuserisimasaani piffissami sivisuumi isornartorsiuisuusimavoq. Kommunip ineqarneq pillugu suliamut atatillugu iliuuserisimasai Kommuninik Nakkutilliisoqarfimmit ilalernqanngillat, kukkunersiuisullu nalunaarusiaani nutaami kommuni suliamut atatillugu isornartorsioqqinneqarluni - ilaatigut attartornissamik isumaqatigiissutaasimasut, "attartortitsisumut qaqutigoorluinnartumik iluaqusiisimasut" pillugit arlalinnit oqaatigineqarsimasut misissorsimanerisa malitsigisaanik isornartorsiuisoqarluni:

- Pisimasut ingerlatsivimmut kinguneqartinneqartariaqarput. Kommunip karsianut ullumikkut miliuunerpassuarnik nalilinnik matoqqasumik ingerlatsisoqartarsimavoq.

Politikkikkut akisussaaffiliisoqarnissaanik siunnersuut oqaluuserisassanngorteqqikkusukkaa

- Kommuni aningaasaliissuteqartartunut akiliutigeriaannagassatut atukkiisimavoq. Tamanna qaqutigoortumik iluaqusiisimavoq, inissiarsuimmi sanaartorlugit naammassineqaqqammersimasut immaqa ukiuni qulini attartorneqareerneranni nutaatut isikkoqartillugit utertinneqartussaapput. Ineqarnermummi akiliutigineqartut qanoq pineqarniarpat? Isumaqatigiissutit amerlanersaat ukiumut tre procentimik qaffattarput, Inga Dora G. Markussen oqarpoq.

Siusinnerusukkut siunnersuutigisimavaa, suliami politikkikkut akisussaaffiliisoqassasoq. Siunnersuut itigartinneqarsimavoq, Nakkutilliisulli kommunimut peqqussutigisimavaat, siunnersuut oqaluuserisassanngorteqqinneqarlunilu suliarineqassasoq. Tamatuma pinissaa Inga Dora G. Markussenip anguniarniarpaa:

- Inissaaleqiffiunitsinni inissanik pissarsiniarsimaneq iluanaarniarfiusimasoq politikkikkut kinguneqartinneqartariaqarpoq. Politikkikkut akisussaaffiliisoqarnissaanik siunnersuutima oqaluuserineqarnissaa amerlanerussuteqartunit itigartinneqarsimavoq. Nakkutilliisut kommunimut peqqussutigisimavaat, siunnersuutip oqaluuserisassanngorteqqinneqarnissaa, tamatumalu pinissaa anguniassavara, taanna oqarpoq.

Kukkunersiuisup nalunaarusiaa kommunip aningaasaqarnermut ataatsimiititaliaata sisamanngornermi kingullermi ataatsimiinnerani politikkikkut suliarineqartussaagaluarpoq, kinguartikkallarneqarsimallunili.

Sermitsiaq.AG-mit borgmesteri Charlotte Ludvigsen (IA) suliamut atatillugu oqaaseqartinniarneqarpoq. Borgmesterip manna tikillugu aalajangiussimanerarpaa, kommunip nammineerluni inissialiortitsinissaanut sanilliullugu, kommunip ineqarnermut tunngatillugu iliuuserisimasaa oqallisaaqisoq akikinnerusoq.

Sermitsiaq.AG-mit pisortaasimasut marluk kukkunersiuisup nalunaarusiamini arlalitsigut isornartorsiorsimasai aamma oqaaseqartinniarneqarput.

Powered by Labrador CMS