Kommuneqarfik Sermersooq: Meeqqat atugarliortut sukkanerusumik siusinnerusukkullu ikiorneqartalissasut
Kommuni meeqqat ilaqutariillu atugarliortut pillugit politikkissamik nutaamik suliaqaleruttorpoq.
Kommuneqarfik Sermersuumi meeqqat ilaqutariillu atugarliortut pillugit siunissami suliniutissanut pitsaanerusumik pinaveersaartitsineq aamma sukkanerusumik angusaqarfiunerusumillu sullissisarneq tunngaviussapput.
Susassaqarfimmut tunngatillugu politikkissami nutaami, Meeqqanut Ilaqutariinnullu Ataatsimiititap aqagu ataatsimiinnermi suliarisassaani tamanna takuneqarsinnaavoq.
Politikkissami tassani anguniakkat tigussaasut pingasut ilanngunneqarsimapput:
Meeqqat pillugit suliat ikilisinnerat - taassuma ataani piffissami sivisuumi ulloq unnuarlu angerlarsimaffinni inissiisarnerit sivisuut
Meeqqanut inuusuttunullu atugarliortunut suliniutit siusissukkut iliuuseqarneqa aqqutigalugu nukittorsarneqarnerat
Meeqqanut ilaqutariinnullu atugarliortunut neqeroorutit pitsaasut
Siusissukkut iliuuseqarneq
Matumani erseqqissumik takuneqarsinnaavoq pissutsit imminnut ataqatigiilluinnartartut, tassami siusissukkut iliuuseqarnermi iluatsilluarnerup imminermini nassatarissammagu meeqqat pillugit suliarisartakkat ikilinerat.
Siusissukkut iliuuseqartarnermut aamma tunngatillugu ilisimatusarnerup takutippaa, suli atualinngitsut siusissukkut iliuuseqarfigineqarnterat aalajangiisuusartoq, politikkissami nutaami tamanna allassimavoq.
- Tassunga pissutaavoq meeqqat inuuneranni ukiut siulliit tassaammata piginnaasanik inunnguuserinngisanik ineriartortitsisinnaanermut peqarnerat ”window of opportunity” (“igalaat periarfissanik ulikkaartut”), ukioqqortusiartortillugit allanngoriartortartoq. Piginnaanerit taakkua kingorna inuiaqatigiinni qanoq inuuneqarnissamut sunniuteqartarput, politikkimi allassimavoq.
Piginnaasat inuunnguuserinngisat tassaapput isummiussat pissusilersuutillu. Kajumissuseqarneq, pinertussuseq imminullu naalakkersinnaaneq taakkununnga ilaapput.
- Aammattaaq ilisimatusarnermit ersersinneqarpoq, meeqqap ukiuini siukkerni meeqqap unammilligassanik malussarniarnikkkut aamma suliniummik eqqortumik aallartitsinikkut peqqissutsikkut atugarissaarnikkullu, oqaatsitigut, aalasinnaassutsikkut aamma pissusilersuutikkut pitsaanngitsumik ineriartortoqarsinnaanera pinaveersaartinneqarsinnaasoq, politikkissatut nutaatut siunnersuummi allassimavoq.
Siusissukkut iliuuseqarnermi kommunip angajoqqaat qanimut suleqatigissavai. Angajoqqaat inuusuttullu atugarliortut ataatatut anaanatullu piginnaasartik nukittorsassavaat.
Eqaannerusumik sullissisarnissaq
Kommunimit meeqqat pillugit suliarineqartartut maannamut ikilisinneqarsimanngillat, amerliartorunnaartiinnarneqarsimapput.
Kommunip tamanna aaqqiiffiginiarlugu sullissisarneq sukateriffiginiarpaaa, kiisalu suassaqarfiit akimorlugit suleqatigiittarneq nukittorsarniarlugu.
- Meeqqat pillugit suliat amerlassusiisa ikilisinnissaannut pisariaqarpoq, suliat allaffissornikkut eqaatsumik, pilertortumik aamma pitsaasumik suliarineqarnissaat. Taamaaliorsinnaanermut sulisut pisinnaasaqarluartut pisariaqartinneqarput, kommunimi tamarmi, qitiusoqarfimmi aamma najukkami. Tamanna isumaqarpoq, sulisussarsiornermut sinaakkutissat aamma sulisooreersunik tigumminniinnarneq aalajangiisuusoq, suleqatigiinnik piginnaaneqarluartunik peqartuaannarsinnaaqqulluni.
Kommunip sulisussarsiortarneq nukittorsarniarlugu sulisunillu tigumminniinnarniarluni sulisut kattuffii oqaloqatiginiarpai. Tamannarpiarmi maannamut aaqqiiffigiuminaannerpaasimavoq. Soorlu Tasiilami sullissisussaqarniarneq ajornartorsiutaasimasoq, ilaatigut atorfiit inuttassarsiuunneqartut kommunimit inuttalerneqarsinnaasarsimanngimmata.
Kommunimit tamanna uppernarsarlugu oqaatigineqarpoq, anguniakkat taakku pingasut anguniarnerat ajornaatsuinnaassagunanngitsoq.
- Meeqqat ilaqutariillu atuarliortut pillugit anguniakkat qaffasissut pineqarput, aamma anguniakkat angujuminartut naammassiniarneqanngillat. Iluatsitsisinnaanermut suleqatigiilluarneq aalajangiisuulluinnassaaq aamma susassaqartunik tamaginnik peqataatitsineq. Illoqarfinni aamma najukkani inuiaqatigiinni allannguutinik ataavartunik pilersitsinissaq ataatsimoorussatut suliassaammat neriuppugut anguniarneranut illit ikiuutissasutit.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...