Kommuneqarfik Sermersooq: Kulturi siuarsarniarlugu tusintinik hunnorujulikkaanik aniingaasaliisoq

Kommuneqarfik Sermersuumi kulturimit aningaasaliissuteqartoqarpoq.

Kulturip siuarsarneqarnissaa pillugu Siunnersuisoqatigiit aningaasaateqarfimmit Sermeq-mit 700.000 koruunit sinniulaarlugit aningaasaliissuteqarnerisigut tamanna pivoq. Aningaasat suliniutinut arfineq-marluusunut kulturimik siuarsaasussanut kommunimillu ataatsimoortitsisussanut atorneqassapput.

Avaaraq Olsen, borgmesteriusoq siunnersuisoqatigiinnilu siulittaasuusoq ukioq manna aappassaanik aningaasaliissuteqartoqarneranik nuannaaruteqarpoq.

Tamanna kommunip nittartagaani atuarneqarsinnaavoq:

- Maannakkut suliniutinut arlalinnut nutaaliortunut inuiaqatigiinnullu attuumassuteqartunut tapiissuteqarpugut.

Borgmesterip oqaatigaa, suliniutit nuannaalersitsillutillu oqallitsitsissasut.

- Suliniutinut taamaattunut Aningaasaateqarfik Sermip tapiissuteqartarnera pingaaruteqarpoq, taamaaliornikkullu siornatigut misiginikuunngisatsinnik kulturikkut tunineqartarpugut, borgnesteri suliniutigisat naammassineqarnissaannut qilanaartoq oqarpoq.

Qinnuteqarsimasut suliniumminnut aningaasaliiffigineqartut tassaapput:

Christoffer Stenbakken, Alberte Parnuuna, Carl Taunajik Florian Sørensen - Tasiilami inuusuttut inuusuttuaqqallu suleqatigalugit professionalimik piviusuusaartitamik nangeqattaartuliornissamut.

Niviaq Korneliussen, Maliina Abelsen, Bilo Høegh Stidsen - “45” Qulliit atorlugit imminut toquttarneq eqqumaffigineqarnissaa siunertaralugu aaqqissuussamut.

Sermersuumi Nipilersornermik Ilinniarfik - Guitarertartoq Mikkel Andersen peqatigalugu workshopertitsinissamut.

Innutaasut Illuat Illorput - The Invisible Robber – sapaatip-akunnerini arfinilinni meeqqanut 8-12-nik ukiulinnut tuluttut oqaaseqarluni isiginnaagassiornissamut, taannalu inaarutaasumik ilaquttanit ikinngutinillu isiginnaarneqarsinnaassaaq.

Susanne Andreassen - Oqaluttualimik HOMO sapiennemik isiginnaagassiornissamut.

Naleraq Eugenius - Suliniut Aakkiartulerpoq – Meltification. Aaqqissuussami sermersuup aakkiartornerata nipaa qanorlu isikkoqarnera sammineqassapput.

Hanne Saandvig Immanuelsen - Nunatta Agiartartoqatigiivini ilaasortanut juullimut tunngatillugu suliniuteqarnermut, marloriarluni tusarnaartitsinissamut juullimilu isiginnaartitsinissamut.