Kommuneqarfik Sermersooq Namminersorlutillu Oqartussat ineqarnikkut periarfissat pillugit saqitsaatsut
Namminersorlutik Oqartussat sulisutik arlallit Kommuneqarfik Sermersuumik misissuitilersimavaat. Namminersorlutik Oqartussat isumaqarput, kommuni pisussaaffimminik qaangiisimasoq, isumaqaramik kommunip Nuummi inissaaleqisoqarnera aaqqiiffiginiarlugu inissiat 300-t missaanniittut sanasumit namminersortumit attartorsimagai, innuttaasununullu attartorteqqillugit.
Kommuneqarfik Sermersuup 2016-imili inissianik nutaanik attartornissaq pillugu Nuummi sanasut namminersortut assigiinngitsut ukiuni qulini atuuttussamik isumaqatigiissuteqarfigisimavai.
Inissiat pineqartut kommunip inissiiatileqatigiiffiiutini Iserit aqqutigalugu inissiat innuttaasunut attartortittarsimavai.
Kommunip aaqqissuussaq innuttaasut 2.000-it sinnerlugit amerlassusillit kommunip inissiaatileqatigiiffiutaani utaqqisutut allatsissimasut inissaqartinneqarnissaannut aaqqiissutissatsialattut isigivaa. Kommunimi nammineerluni inissianik sanaartortitsissaguni aningaasarpassuarnik atuisussaagami.
Namminersorlutilli Oqartussat aaqqissuussaq iluarinngilaat. Tassani isumaqartoqarami kommuni pisussaaffimminik qaangiisimasoq, aaqqissuussarlu unitsinneqartariaqartoq. Tamana Namminersorlutik Oqartussat Kommuneqarfik Sermersuullu allaqatigiittarsimaneranni takuneqarsinnaavoq, allagaqatiittarsimaneranni allagaatit Sermitsiaq.AG-mit takuneqarsimapput.
Nakkutilliineq sisamanngorpat aallartinneqassasoq
Eqqartuussissuserisut allattorsimasaat, kukkunersiuisut naatsorsorsimasaat akiliisitsinissamillu sioorasaarutit kommunip Namminersorlutillu Oqartussat akornanni piffissap ukiup aappaa avillugu uteqartaarsimapput, ullumikkullu tamatuma kinguneranik Namminersorlutik Oqartussat kommunimi annertuumik misissuinissamik nassataqarsimalluni.
Kommuneqarfik Sermersuup inissaqartitsiniarnermut atatillugu aaqqissuussaa
Kommuni ingerlatseqatigiiffimmut namminrsortumut attartornissamik isumaqatigiissuteqarpoq. Attartornissamik isumaqatigissut nalinginnaasumik ukiuni qulini sivisussuseqartassaaq, ukiullu qulit qaangiunneranni inissiat pisiarineqarsinnaallutik.
Kommunip inissiaatileqatigiiffiutaata Iseritsip inissiat innuttaasunut inissaminnut utaqqisunut attartortissavai imaluunnit sulisunut inissiatut atortassallugit.
Ineqarnermut akiliutit innuttaasunit akilerneqartartut, Kommuneqarfik Sermersuup ingerlatseqatigiiffimmut namminersortumut attartornermini akiliutigisartagaanut matussusiisanngillat. 2018-imi ineqarnermut akiliutit kommunip sanatitsisunut akiuliutigisartagai kvadratmerimut 1481 koruuniusimapput. Kommuni naapertorlugu, innuttaasunut attartortitseqqinnermi agguaqatigiissillugit kvadratmeterimut 829 koruunit isertinneqartarsimapput.
Kommuneqarfik Sermersooq amigartoorutinut matussusiiniarluni 2020-mi Iseritsimut 29.488.177 koruuninik akiliuteqarnissamut missingersuusiorsimavoq.
Kukkunersiuisarfiup Deloittep naatsorsuisimanera malillugu, nammineq inissialiortitsinermut sanilliullugu inissiat attartoriarlugit attartorteqqinneqarnissaat Kommuneqarfik Sermersuumut akikinneruvoq. Ilaatigut ineqarnermut akiliutit kommunip nutaanik sanaartortitsinerani aningaasartuutaasussanut matussusiisinnaannginnerat pissutigalugu.
Pissarsiffik: Kommuneqarfik Sermersooq
Namminersorlutik Oqartussat Nunami Namminermut immikkoortortaqarfiata naatsorsuutigaa, nakkutilliinermi sulisut tallimat arfineq-marlullu akornanniittut suliamut atatillugu kommunp pappialaataanik misissuissasut.
Namminersorlutimmi Oqartussat pappialatut uppernarsaatit kommunimit maannamut tunniunneqarsimasut naammaginngilaat. Kommunimit akerlianik isumaqartoqarpoq, Namminersorlutik Oqartussat akorngusersuiinnartut, aamma Namminersorlutik Oqartussat pappialanik tunniunneqarsimasunik iluamik misissuisimanngitsut.
Tusagassiorfitsigut saqqummiunneqartut Namminersorlutik Oqartussat apeqqusiitisimmagaat
Suliaq aallartissimavoq, Sermitsiap Nuummi sanaartortoqarnera 2019-imi apriilip qaammataani saqqummiummagu. Tassani atuarneqarsinnaasimavoq, kommuni inissiaqarfimmik 58-inik initalimmik suli sananeqarsimanngitsumik attartorsimasoq.
Tamatuma malitsigisaanik Naalakkersuisut Siulittaasuata Naalakkersuisoqarfiani Nunamut Namminermut immikkoortortaqarfik kommunimut saaffiginnissimavoq. Immikkoortortaqarfiup akisussaaffigaa, nakkutigissallugu inatsimmi sinaakkusiussat malillugit kommuni iliuuseqarsiamnersoq. Immikkoortortaqarfimmit apeqqutit arlallit akeqquneqarsimapput.
Inissaqartitsiniarnermik aaqqissuussap qulaajarlugu suliarineqarneranut atatillugu, Nunamut Namminermut immikkoortortaqarfiup Eqqartuussissuserisoqarfik Poul Schmidt, Danmarkimi Kammeradvokatitut aamma ilisimaneqartoq misissuitissimavaa.
Eqqartuussissuserisup misissuinera peqqussuteqarnermik nassataqartoq
Eqqartuussissuserisup misissuinermini inerniliussimavaa, aaqqissuussaq inatsimmik unioqqutitsinerusoq, kommunilu tamatumannga unitsitsisariaqartoq.
Kommuneqarfik Sermersooq akerliliilluni eqqartuussissuserisut Malling & Hansen Damm eqqartuussissuserisoqarfiup oqaaseqaataanik misissuiteriarlugu oqaaseqaatilioqqusimavaa, taakku Kammeradvokatip misissuisimanerani pineqartunik arlalinnik qularnartoqartitsimapput.
Kommunilli eqqartuussissuserisuanit akerliissutit Namminersorlutik Oqartussanit isumaqatigineqanngillat. Naalakkersuisut Siulittaasuata Naalakkersuisoqarfia februaarip aqqaneq-aappaani Kommuneqarfik Sermersuumut peqqussuteqarpoq. Kommuni ataavartumik inissaqartitsinissaq siunertaralu attartornissamik isumaqatigiissuteqarsimanermik unitsitsissaaq.
- Peqqussuteqartoqarpoq, taamatut suleriaaseqarnerup inatsisitigut malittarisassanut atuuttunut naapertuutinngissorineqarnissaanut tunngavissaqarmat. Peqqussut atuutissaaq kommunip allatut nalunaarfigineqarnissaata tungaanut, Naalakkersuisut Siulittaasuata Naalakkesuisoqarfia Kommuneqarfik Sermersuumut allappoq.
Tamatuma kingorna naalakkersuisoqarfik kommunimit atortunik amerlanerusunik piusmaqarsimavoq. Kommuni karserpassuarnik tunniussisimavoq, naalakkersuisoqarfilli naammaginninngilaq. Taamaammat naalakkersuisoqarfiup aggustip qaammataata qiteqqunnerani nalunaarutigisimavaa, kommunimi ullumikkut nakkutilliisoqassasoq.