Kommuneqarfik Sermersooq Namminersorlutik Oqartussanit tatineqartutut misigisimasoq
Borgmesteri isumaqarpoq, Namminersorlutik Oqartussat kommunip inissaqartitsiniarnikkut aaqqissuussaanik nakkutilliinerminnut atatillugu kommunip inatsimmik unioqqutitsinissaa anguniaraat. Tamannali Nunamut Namminermut Immikkoortortaqarfiup nakkutilliinermik suliaqartup akerlilerpaa.
Kommuneqarfik Sermersuumit naammagineqanngilluinnarpoq, Namminersorlutik Oqartussani Nunamut Namminermut Immikkoortortaqarfiup kommunimik nakkutilliilluni suleriaaserisimasaa.
Nunamut Namminermut Immikkoortortaqarfik kommuninik nakkutiginninnissamut immikkut ittumik pisussaaffeqarpoq, immikkoortortaqarfimmillu maannakkorpiaq misissorneqaleruttorpoq, Kommuneqarfik Sermersooq inissanik pissarsiniarnermini inatsisinik malinnissimanersoq.
Kommunip ukiuni kingullerni Nuummi inissiat 300-t missaanniittut sanasumit namminersortumik attartortarsimavai, innuttaasunullu inissaqanngitsunut attartorteqqittarsimallugit.
Nunamut Namminermut Immikkoortortaqarfiup suliap naqqa tikillugu paasisaqarusulluni, inissianut Kommuneqarfik Sermersuup attartortissimasaanut tunngatillugit attartornermi isumaqatigiissutaasimasut tamaasa takorusussimavai.
Tunniussineq inatsimmik unioqqutitsinerussasoq
Tamanna borgmesterimit naammagineqanngilaq:
- Isumarsimavugut suliami matumani pineqartoq, kommuni inissianik attartortitseqqikkaangami ineqarnermut akiliutinut tapiissuteqarsinnaanersoq. Paasiuminaatsippara pineqartumut tunngatillugu isummerniarluni, inuit 300-t sinnillit attartornermut isumaqatigiissutaannik sooq takusaqartariaqartoqarnersoq, Kommuneqarfik Sermersuumi borgmesteri Charlotte Ludvigsen (IA) oqarpoq.
Kommuni isumaqarpoq, inummut tunngatillugu paasissutissanut inatsit unioqqutinneqassasoq kommuni attartornermut isumaqatigiissutinik, kommunip inissiaatileqatigiiffiutaani Iserimmi, aktiaatileqatigiiffiusumi uninngasuutigineqartut tunniunneqarpata.
- Namminersorlutik Oqartussat suleqatigerusuppavut, inatsimmilli unioqqutitsinianngilagut, inummut tunngatillugu paasissutissanut inatsit erseqqissuuvoq. Kommunimi aqutsisoqarfik attartornermi isumaqatigiissutinut atatillugu susassaqanngilaq, taamaammallu taakkunannga tigummiaqartussaanani, Charlotte Ludvigsen oqarpoq.
Allakiaq najoqqutarineqartoq
Eqqartuussissuserisut Nuna Lawikkut allakkiaat kommunip matumani najoqqutaraa. Eqqartussissuserisut allakkiaminni inerniliussimavaat, Iserit nakkutilliisut pisussaaffiinut attuumassuteqanngitsoq, taamaammallu attartortut isumaqatigiissutaasa tunniunneqarnissaat itigartitsissutigineqartariaqartoq.
Eqqartuussissuserisut aamma oqaatigisimavaat, kommuni attartortut isumaqatigiissutaasa assilinerannik peqaraluartoq, nakkutilliisut suliamik naliliinissaannut taakku attuumassuteqanngitsut, kommunilu taamaammat taakkunannga tunniussisariaqanngitsoq.
Nunamut Namminermut immikkoortortaqarfimmi pisortaq Klaus Georg Hansen ilisimatitsivoq, suliat ingerlanneqatut pillugit oqaaseqarsinnaanani. Taamaammat oqaaseqarfigisinnaannginnerarpaa, nakkutilliinermut atatillugu innuttaasut attartornermut isumaqatigiissutaat sooq takorusunneqarsimanersut.
Nakkutilliisut siulittaasuat isumasioreerlugu nakkutilliisoqartoq
Taassumali oqaatigaa, Nunamut Namminermut Immikkoortortaqarfiup nakkutilliineranut atatillugu kommuni inatsimmik unioqqutitsinissaa siunertarineqanngitsoq.
Klaus Georg Hansen naapertorlugu, kommunimut ornigulluni sisamanngormat nakkutilliisoqarsimavoq. Nakkutilliisoqarfimmi siulittaasoq Solja Ólavsstovu isumasioreerlugu nakkutilliisoqarsimavoq, pissutigalugu Nunamut Namminermut Immikkoortortaqarfik uppernarsaatinik piumaneqartunik tamanik tigusaqarsimannginnera.
Sisamanngormat nakkutilliisoqarnerani Namminersorlutik Oqartussat karserpassuanik atortussanik imalinnik, maanna misissorneqartussanik tunineqarsimavoq. Klaus Georg Hansen naapertorlugu, attartorsimasut isumaqatigiissutaannik tunniussisoqarnissaanik suli piumasaqartoqassanersoq Nunamut Namminermut Immikkoortortaqarfik tamatuma kingorna isummerumaartoq.