Kommuneqarfik Sermersooq minguinnerusumik suleriuseqarnermi siuttoorusuppoq
Kommuneqarfik Sermersuumi eqqiaanermi qaqorsaatinut maqitsiveqalernikkut eqqiaassutit puukuinik eqqaaneq annikillisinneqarsimavoq, eqqiaassutillu qaqorsaatit avatangiisinut mingutsitsinnginnerusut atorneqalerlutik.
Kommuneqarfik Sermersooq avatangiisinut mingutsitsinnginnerujumavoq, avatangiisinullu mingutsitsinaveersaarnermi siuttuujumalluni.
Kommunep eqqiaanermi qaqorsaatit anginerusunik puullit atorunnaarlugit, eqqiaanermi qaqorsaatit akoorneqareersut mikinerusunillu pooqartut atulerpai. Qaqorsaatinut akoruutit Nuummi, Paamiuni Tasiilamilu atuarfinni, sunngiffimmi neqeroorutini, meeqqeriveqarfinni kommunillu suliffeqarfiini tamani atorneqalerput.
Taamaasilluni kommuni ukiumi atuarfiusumi 2016/2017-imi qaqorsaatinik taakkulu puukuinik 10 tonsinik igitassakinnerulerpoq.
- 2015/2016-imi qaqorsaatit taakkulu puukui 23 tonsit kommunimi atorneqarput.
- 2016/2017-imi qaqorsaatit taakkulu puukui 13 tonsit kommunimi atorneqarput.
Atuinikinnerulernerup kingunerisaanik kommunip qaqorsaatinut aningaasartuutini ukiup ataatsip ingerlanerani 31 procentinik ikilisippai.
- Nunat tamalaat akornanni pissutsit qiviarutsigit, takusinnaavarput plastikkinik atuineq eqqagassaqarpallaarnerlu ajornartorsiutaasut. Nunarsuarmi nunani arlalinni ajornartorsiut aaqqiiviginiarneqarpoq. Maani uagut annikitsunnguamik allannguilluta akiuiniaqataavugut, alloriarneq annikikkaluartoq avatangiisinut pitsanngorsaataavoq, Kommuneqarfik Sermersuumi pisiortornermi aqutsisoq, Carsten Brøndum Jensen Sermitsiaq.AG-mut oqarpoq.
Avatangiisit pitsaanerusut
Carsten Brøndum Jensen oqaluttuarpoq eqqiaanermut qaqorsaatinik nioqquteqartut piumaffigisimagai. Piumasaqaatit annertunngillat: eqqiaanermut qaqorsaatit avatangiisinut mingutsitsinngitsut, kimittunerusut annikinnermillu poortuuteqartut. Iluaqutaasoq tassaavoq igitassat ikilisinneqarneri, eqqiaasullu oqinnerusumik sulisinnaalernerat.
- Siornatigut dunkersuit oqimaatsut nassatarisariaqartarpaat, maannakkulli ajornannginnerulerpoq dunkit mikinerulernikuummata, taamaattumillu qitikkut anniartarneq pinngitsoortinneqarsinnaanngorluni, Carsten Brøndum Jensen oqarpoq.
Eqqiaasuinnaanngillat sulinerminni pitsaanerusumik atugaqalersut. Meeqqerivimmi Apissimi pisortap allannguutigineqartoq aamma iluarisimaarpaa.
- Qaqorsaatit tipigissaatitaqanngitsut atorneqalermata kommunip suliffeqarfiiniittartunut iluaqutitaqarpoq. Taamatut pitsanngorsaasoqarnera meeqqerivinni ilassilluarparput, uaguungattami meeqqanut akisussaasuusut, Apissimi pisortaq Jesper Andersen oqarpoq.
Siunissaq pillugu suliniut
Kinguaariillu tullii maanna meeqqerivinniittuusut siunissaat kommunip eqqanaarusuppai. Nunat tamalaat akornanni misissuinerit arlallit takutippaat ukiut 30-t 50-illu akornanni qaangiuppata imaani eqqakkat plastikkiusut aalisakkaniit amerlanerulersimassasut.
- Avatangiiserput paarilluassavarput, taamaattumillu Kommuneqarfik Sermersooq atorluaanerunissamik illersuisunut ilannguppoq. Misissuinerit takutippaat ukiut 30-t qaangiuppata imaani plastikkit aalisakkaniit amerlanerulersimassasut, tamannalu amiilaarnaqaaq, Carsten Brøndum Jensen oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...