Kommuneqarfik Sermersooq meeqqat pisinnaatitaaffii pillugit pikkorissarpoq
Meeqqat pisinnaatitaaffii pillugit sullissivik, MIO Kommuneqarfik Sermersuumi kommunalbestyrelsemi ilaasortat martsip 13-ani 14-anilu Naalagaaffiit Peqatigiit Meeqqat pillugit isumaqatigiissutaanni meeqqat pisinnaatitaaffii pillugit seminareqarput.
Kommuneqarfik Sermersuumi kommunalbestyrelsemi ilaasortat Naalagaaffiit Peqatigiit Meeqqat pillugit isumaqatigiissutaannik naammassinninnissaminnut pitsaanerorusupput. Taamaammat kommunalbestyrelse, MIO peqatigalugu, ulluni marlunni sammisaq pillugu seminareqarput, pisinnaatitaaffiit pineqartut kommunalbestyrelsip sulinermini naammassilluarnerunissaanut ilisimasaqarnerulerniarlutik.
MIO tusagassiutinut nalunaarummini ilisimatitsivoq misilittakkat takutikkaat Naalagaaffiit Peqatigiit Meeqqat pillugit isumaqatigiissutaanni immikkoortut 54-iusunik ukkatarinninnissartik politikerit ulluinnarni piffissaqarfigisanngikkaat.
Seminari nuannaarutigaa
Meeqqat Illersuisuat Aviâja Egede Lynge Kommuneqarfik Sermersuumi kommunalbestyrelsemi ilaasortat meeqqat pisinnaatitaaffii pillugit ilisimasaqarnerulerumallutik piffissaqarnerat nuannaarutigaa.
- Nuannaarutigaara arlallit pissutigalugit meeqqat pisinnaatitaaffii pillugit isumasioqatigiinneq pisinnaasimammat: Siullermik ersarippoq malunnarlunilu, kommunalbestyrelsi soqutiginnilluarlunilu paasisaqarusuttoq meeqqat pisinnaatitaaffiinik paasisaqarnissaminut sulissutiginninnissaminullu. Tunniusimanerat siunissami annertuumik neriulersitsivoq, Meeqqat Illersuisuat Aviâja Egede Lynge tusagassiutinut nalunaarummi oqarpoq nangillunilu:
- Aappassaanik MIO ilisarisimaneqarpoq politikerinik uparuartuisartutut, Meeqqat pillugit Isumaqatigiissut malinneqanngikkaangat. Aqqutissarli tassaavoq meeqqat pisinnaatitaaffii pillugit ataatsimoorussamik oqaaseqarnissaq pisinnaatitaaffinnillu paasinninnissaq. Tamannalu uani isumasioqatigiinnermi misigisimavara.
Kommuneqarfik Sermersuup borgmesteriata seminareqartoqarnera aamma nuannaarutigaa. Taanna isumaqarpoq kommunalbestyrelsemi ilaasortat isumaqatigiissummi immikkoortortanut tunngatillugu ilisimasaqarnerulersut. Ilisimasat kommunalbestyrelsemi sulinermi atorluarneqarsinnaapput.
- Meeqqanut inuusuttunullu suliniuteqarneq Kommuneqarfik Sermersuumi pingaarnerpaatut inissisimavoq, kommunalbestyrelsilu ukiut tamaasa meeqqat atugaat pitsanngorsarniarlugit aaliangiisarpoq. Taamaammat uagut kommunalbestyrelsimi ilaasortat uani pikkorissarnermi peqataanerput assut iluaqutaasimavoq. Ilisimasanik nutaanik amerlasuunik pissarsisimavugut, suleriaqqinnissatsinnulllu annertunerusumik ilisimasaqalersimalluta, Asii Chemnitz Narup (IA) oqarpoq.
Innersuussutit
MIO tusagassiutinut nalunaarummi ilisimatitsivoq kommunalbestyrelsi meeqqat pisinnaatitaaffii pillugit pingaarnersiuilluni innersuussisoq, qanoq ililluni Kommuneqarfik Sermersuumi FN’ip Meeqqat pillugit Isumaqatigiissutaa eqquutsinneqassanersoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...