Kommunefogedinik amigaateqarnerup innuttaasut toqqissisimajunnaarsikkai
Nunatsinni nunaqarfinni arfinilinnikommunefogedeqanngilaq. Innuttaasunit pissutsittaamaannerat toqqissisimanarineqanngilaq,ulorianartunillu pisoqartillugu politiit innuttaasunutnalinginnaasunut ikiortissarsiortarnerannikmisigisaqartarlutik.
Nunaqarfiit Tasiilap eqqaani Kuummiut, Uummannap eqqaani Qaarsut Ukkusissallu, Maniitsup eqqaani Napasoq, Qaqortup eqqaani Eqalugaarsuit Qassimiullu, kommunefogedeqanngillat. Sermitsiaq Kuummiuni, Qaarsuni, Ukkusissani aamma Napasumi innuttaasunik oqaloqateqarsimavoq, nunaqarfimminni kommunefogedeqannginneranik qanoq misigisimanerat pillugu.
Kuummiut, ullumikkut 248-nik innuttaqartoq, ukiuni arlaqalersuni kommunefogedeqarsimanngilaq. Eli Ignatiussen kommunefogedinngorusunnersoq arlaleriarluni aperineqartarsimagaluarpoq, nuliamili uummalluttuunera pissutigalugu qujaannartarsimalluni, unnuakkut sianerfigineqassagaluaruni ernumatikkusunnginnamiuk.
– Kommunefogedeqannginnerput ilaatigooriarluni ajornakusoorsinnaasarpoq. Nunaqarfimmi innuttaasorpassuuvugut. Taamaammat pingaartumik akissarfinni ernguttoqartorujussuusarnera malugisinnaasorujussuusarparput. Ilungersunartunillu pisoqaraangat kommunefogedeqannginnerput ernumanartorujussuusarpoq, Eli Ignatiussen oqarpoq.
Nulianilu marluullutik Qaqortumi ukiorpassuarni najugaqareerlutik Kuummiunut, nuliata aggerfigisaanut, 2014-imi nuussimapput. Politiinit ulorianartumik pisoqartillugu ikiorneqarnissamik pisariaqartitsisunit sianerfigineqartarneq misigisarsimavaa.
Angajoqqaat imminorsimasoq pillugu oqaluttuussimagai
– Maanga nooqqammerluta Tasiilami politiit unnuakkut sianerput qinnuigalungalu aallaasersortumut orniguteqqullunga. Aallaasersortumik ilisarisimannittumik ujaasisimapput, uangalu nassaarisimallunga. Kisimiillunga anisariaqarsimavunga, tamannalu toqqissisimanarpallaarsimanngilaq, kisianni allanik pisussaqanngimmat orniguttariaqarsimavunga. Qujanartumik pineqartoq oqaloqatigalugu eqqissisarsinnaasimaavara ilisarisimagakku, annerusumillu pisoqarnani, Eli Ignatiussen, aalisartuullunilu piniartuusoq, oqaluttuarpoq.
Jonas Tukula, Kuummiuni aamma najugaqartoq, kommunefogediusimavoq, 2011- mili soraarsimalluni. Politiinit akuttunngitsumik sianerfigineqarneq misigisarpaa, qatserisarfimmi holdlederiugami, assersuutigalugulu angerlarsimaffinni eqqissiviilliornernut orniguteqquneqartarsimalluni. Aamma misigerusunngisaminik allanik misigisaqartarsimavoq.
– Ataasiarlunga politiit ikiorpakka, taakkunannga qinnuigineqarama angajoqqaat attaveqarfigissagikka, taakku qitornaat imminut toqussimammat. Pisoq tamanna misigerusussimanngikkaluarpara, angajoqqaat qitornaat toqusimasoq oqaluttuutissallugit uannut sakkortoorujussuusimammat. Tamatuma kingorna Tasiilami aqutsisunnut allappunga, politiit suliassaannik suliaqaqqinniarnanga, kommunefogediunnginnama, Jonas Tukula oqarpoq.
Allaaserineqartoq aviisimi Sermitsiami tamakkiisumik atuaruk. Aviisi uani pisiarineqarsinnaavoq: