Kommunefogedinik aatsaat taamak sulisoqartigisoq
Kommunefogedit amerlanerulernissaat anguniarlugu suliniuteqarsimaneq iluatsilluarsimavoq, Kalaallillu Nunaanni kommunefogedit aatsaat taamak amerlatigisut atorfinitsinneqarsimallutik, Inatsisinik Atuutsitsinermut Ministeeriaqarfik ilisimatitsivoq. Nunaqarfiilli arfinillit suli kommnefogedeqanngillat.
Kalaallit Nunaanni Politiit 2020-mi kommunefogedinik qulingiluanik atorfinitsitsisimapput, marluinnaallu suliunnaarsimallutik.
- Kommunefogedit maanna 59-iulerput, aatsaallu taamak amerlatigalutik. Nunaqarfiit arfiniliinnaat maanna kommunefogedeqanngillat, Danmarkimi Inatsisinik Atuutsitsinermut Ministeeriaqarfik Folketingip Kalaallit Nunaannut tunngasutigut Ataatsimiititaliaanut killiffik pillugu allakkamini allappoq.
Taamaalilluni kommunefogedinik sulisussarsiorneq iluatsilluarsimavoq. Suliniut 2019-imi aallartinneqarsimavoq, tassani politiit suliffik pillugu annertuumik paasititsiniaallutik aallartissimallutik.
2019-imi aqqaneq-marluk atorfinitsinneqarsimasut
Politiit 2019-imi kommunefogedinik aqqaneq-marlunnik atorfinitsitsisimapput, tallimat suliunnaarsimallutik.
Suliniut aallartinneqarsimavoq, danskit aningaasanut inatsisaatigut ukiuni 2018-imiit 2021-mut ukiumut én million koruuninik kommunefogedinut immikkoortitanut immikkut aningaasaliissuteartoqarmat.
Inatsisinik Atuutsitsinermut Ministeeriaqarfik, Folketingip Kalaallit Nunaannut tunngasutigut Ataatsimiititalaanut aningaasaliissutit qanoq atorneqarsimanerisa killiffiannik tunniusseqqammerpoq.
Suliniutip ilaatut, nunaqarfiit ilaasa kommunefogedii ataatsimiit marlunnut amerlineqarsimapput, paasiniarlugu allamik suleqateqarluni suliassanik isumaginnittalernikkut, amerlanerusut suliffissarsiortalissanersut.
Aaqanngitsumik serpalittaammillu qasilittortalimmik tunineqartartut
2020-mi nutaamik atorfinitsitsineq ataaseq, nunaqarfimmi ataatsimi sulisunik amerliilluni pisimavoq.
Killiffik pillugu allakkiaq naapertorlugu, Kalaallit Nunaanni Politiit kommunefogedinut attaveqartarneq maanna ukkatariniarpaat, ataqatigiinnerulernissaq kommunefogedillu suliinnarnissaat anguniarlugu.
Kommunefogeditut atorfinitsinneqartut illersuutissaannik, tassaasunik serpalittaammik qasilittortalimmik aaqanngitsumillu nutaanik tunineqartarput, kommunefogedit taakku qanoq atorneqarnissaannik ilinniartinneqartarput, allakkiami allassimavoq.