Kommunefogedi kasuttorpoq
Ullumikkut ukioq ataasinngorpoq 22-nik ukiulik Inuk Larsen, Flyvestation Karupip ungasinngisaani toqutaammat.
KFUM-ip sakkutuunut angerlarsimaffia 22-nik ukiullip Inuk Larsenip angerlarsimaffigaa. Flyvestation Karupimi sakkutuutut atunngikkaangami, KFUM-imiittarpoq. Tassani aamma toquvoq.
Inuk Larsen meeraallunili sakkutuunngorusussimavoq. Ilinniarnertuunngoreernermi kingorna Karupimut aallarpoq, sakkutuunngoriartorluni.
Inuk Larsen oktoberip 7-ani 2019-imi aqqusinermi pisuinnaat ikaartarfiatigut ikaassalluni aqqusinikkuulermat, biilip qaqortup VW Up-ip aporpaa, 28 miiterinillu isorartutigisumik tammisillugu. Biilit apuisut ingerlaqqiinnarput.
Qanoq iliorsinnaanngitsoq
Timmisartoqarfiup isaariaani sakkutuut pigaartut qanngorpallammik tusaasaqaramik ingerlaannarlutik ornigupput ikiuigasuarniarlutik. Kalaalerli sakkutuujusoq ikiorneqarsinnaanani toqqutigisassaminik aqqunartitersimavoq.
- Sakkutooq toqutaagaangat suliagut tamaasa iparartarpagut, oberst Palle Mikkelsen oqaluttuarpoq. Taanna Karupimi sakkutuut mittarfiani aqutsisuuvoq.
Toqusumik kalerriiartortoq
- Siullertut ilaqutaasut kalerrissavagut. Danmarkimi najugaqarpata nammineq ornigulluta kalerriissaagut, Inuk Larsenilli ilaqutai Danmarkimi najugaqanngillat. Arktisk Kommando suleqatigalugu Kitsissuarsunni kommunefogedi attaveqarfigaarput.
Ataasinngornermi oktoberip 7-ani unnoqqaakkut nalunaaqutaq 20.20 missaani Kitsissuarsunni ilaqutariit Larsenikkut matuanni kasuttortoqarpoq.
- Kommunefogedi iserpoq. Ingippugut. Taassuma assaga tiguaa oqarfigalungalu: "Ajuusaarpunga. Ernersi, Inuk Larsen, biilinit aportissimavoq toqullunilu", Mina Larsen, Inuk Larsenip arnaa oqaluttuarpoq.
Tupaqqavunga
- Qujaffingaara. Tupaqqarujussuarpunga, qiasinnaanngilangaluunniit. Eqqarsaatigiinnarlugu inornarpoq, erninnguara Danmarkimiilluni, nalusaminit najorneqarluni toqusimasoq, nalasoq. Ernera ilaquttagut ilaginagit nalasoq, eqqarsaatinni assut inorsarpunga. Anaanaga uagutsinniikkami, taanna ingerlaannarluni qissaserpoq.
Piffissami tassani Karupimi suligasuartoqarpoq. Sakkutooq toqusimappat suleriutsit aalajangersimasut atuupput - danskillu Irakimi aamma Afghanistanimi illersornissakkut suliaqartareerlutik, toqusoqartillugu suleriutsit misilittagaqarfigilluarpaat.
Ilaqutaasut ilisimatinneqareermata oberst Mikkelsenip suleqataatalu kaptajn Jacob Bjerregaardip suliassarilerpaat sakkutuup ajunaartup ilaqutaasa oqaloqatigisarnissaat qaangiilluarnissaat anguniarlugu. Aamma aalajangerneqarpoq ilaqutariit Danmarkimut tikippata, kaptajn Bjerregaardip isumagissagai.
Challengerimik Danmarkimut
Sakkutuut timmisartuannik Challengerimik ilaqutariit Danmarkimut tallimanngornermi aallartussanngorput.
- Ataatsimoorluta aallaqatigiittussanngorpugut. Panippulli angajulleq taamani 17-inik ukioqartoq, taassuma anini taama itsillugu takorusussimanngilaa. Taamaattumik aalajangerpugut uima panipput angerlarsimaqatigiinnassangaa. Taava uanga, panipput nukarleq aqqaneq-marlunnik ukioqartoq, ernitta illortaava anaanagalu aallarpugut. Umiatsiamit Aasiannut, Aasianniit Kangerlussuarmut timmisartumik taavalu Kangerlussuarmiit sakkutuut timmisartuannik Danmarkimut. Angalanissaq tamarmi sakkutuunit isumagineqarpoq, Mina Larsen oqarpoq.
Ilaqutariit Karupimut tikimmata Mina Larsenip atsaava Karen Angubesen ikinngutaalu Johnny Andersen peqataalerput. Taakku Danmarkimi najugaqarput ikiuutissallutillu, soorlu nutserissussillutik. Ilaqutariit akunnittarfimmut inissipput, Jacob Bjerregaard peqatigalugu.
Sapaatip akunnerata naanerani Inuup sakkutuutut inissisimaffia pulaarneqarpoq.
Suliap paasineqarnera
Marlunngorneq 15. oktober – ajutoornermit sapaatip akunnera qaangiuttorlu - ilaqutariit Challengerimut ikipput nunatsinnut angalassallutik. Aallannginnermili ilisimatinneqarsimapput, tassa ataasinngornermi, suliami paasisaqartoqarsimasoq:
- Ajanniinnitsinni telefon sianerpoq. Politiit kalerriipput Viborgimi politimesterip tullia aggertoq, paasissutissaateqartorlu, Mina Larsen oqaluttuarpoq.
- Vicepolitiinspektør Poul Vestergaard-Lau iserpoq oqaluttuarlunilu biilinik apuisoq tigusarineqarsimasoq. Qassinik ukioqarnera oqaluttuarigamiuk, tassa 71-inik ukioqartoq, tamatta tupappugut. Nukarliliarput taamani oqarpoq: "Aataatut ukiulik" Paasisagut pillugit qujavugut, aamma eqqissiallappugut.