Kommune sulisuminut inissianik 22-nik sanaartortitsisoq

Sulisunut inissiat 22-t Qaqortumi sanaartorlugit naammassineqarneri Kommune Kujallermi borgmesterip nuannaarutigaa. Sulisunut inissiat Nanortalimmi Narsamilu aamma sanaartorneqassapput.

Qaqortumi kommunip ataani sulisut inissiaat 22-t sanaartorlugit naammassineqarput. Kommunimi borgmesterip inissiat nutaat nutserfigineqariaannanngorneri nuannaarutigai.

- Nuannaarutigaara inissiat nutaaffaariit maanna sulisutsinnik najugarineqarsinnaanngornerat, Kommune Kujallermi borgmester Stine Egede (IA) kommunip nittartagaani oqarpoq.

Inissaaleqineq sulisussaaleqinermik kinguneqartartoq

Borgmesterip erseqqissarpaa inissiat ajornartorsiutaasarneri pissutaallutik kommuni ilaanni sulisussaaleqilersartoq.

- Sulisorisatsinnummi ininik pitsaasunik najugaqartitsiniarneq ilaatigut ajornartorsiutaasarpoq, tamannalu pissutigalugu sulisut pikkorissut ilaatigut nuuttarneranni annaasinnaasarpagut; taamaattumik inissiat nutaat piareernerat sulisut pitsaasunik ineqarnissaannut qulakkeerinneqataassammata nuannaarutigeqaakka, Kommune Kujallermi borgmesteri Stine Egede oqarpoq.

Corona kalluaasimavoq

Sulisunut inissianik sanaartortitsineq 2019-imi aallartissimavoq. Coronalli tunillaassuunnerata kingunerisaanik sanaartornermi atortut tikinnissaat kinguaattoortarsimapput, sanaartornerlu taamaasilluni kinguaattoorfeqalersimalluni.

Sanaartortut inissianut matuersaatit kommunimut maanna tunniuppai. Inissiallu maanna iserterfigineqariaannanngorput.

Kommune Kujalliup ilisimatitsissutigaa kommunip sulisuinut inissiani Nanortalimmi Narsamilu aamma sanaartortitsinissamik pilersaaruteqarlutik.

Powered by Labrador CMS