Kommune mianersoqqusivoq: Utoqqalinersiallit ilaat annikinnerusumik pisartagaqalerput
Ukiup nikinneranit utoqqalinersiallit ilaat qaammammut 2.800 koruuninik ikinnerusunik utoqqalinersiaqarsinnaapput. Borgmesteri isumaqarpoq tamanna kommunip aningaasartuutaanut ilasaataasinnaasoq.
Obs: Allaaserisaq naqqinneqarpoq Avannaata Kommuniani borgmester Palle Jerimiassen erseqqissaassuteqareerneratigut. Palle Jerimiassen pingasunngornermi ualikkut nassuiaavoq utoqqalinersiutisisartut sulisartumik aappallit ilaat taakkuusut utoqqalinersiat tapiinik annikinnernik pisalertut.
Juullip ukiortaallu akornanni utoqqalinersiallit arlallit 2024-mi januaarip aallaqqaataaniit qaammammut utoqqalinersiatik ikinnerulernissaat pillugu Avannaata Kommunianut saaffiginnipput. Soraarnerussutisiaqalernissamut aaqqissuussinerup nutaap kinguneraa, aapparisap isertitai soraarnerussutisiaqalernissamut aalajangiisuussanngitsut, taamaalilluni utoqqalinersianut tapiliussaq kisimiittunut annikinnerulertoq:
- Juullip ulluisa ingerlanerini utoqqalinersiutilinnit arlalinnit saaffigineqarsimavunga, utoqqalinersiutitik 20 %-it angullugit appartinneqarsimanerat pillugu ernumallutillu paatsuungasunit, Avannaata Kommuniani borgmesteri (attaviitsoq) Palle Jerimiassen oqarpoq.
Soraarnerussutisiaqartut aappallit ilaat qaammammut 2.800 koruuninik utoqqalinersiakinnerulersimasut ilisimatitsivoq.
Kommuni naapertorlugu utoqqalinersiallit utoqqalinersianut tapiissutit appartinneqarnissaannik ilisimatinneqarsimanngillat, taamaattumillu ukiumi nutaami isertitaqarpiarunnaarnissaminnut piareersarnissamut periarfissaqarsimanngillat.
Pilersuisussaatitaaneq ukiaq atorunnaarsinneqartoq
Ukiaq Inatsisartut ataatsimiinneranni utoqqalinersianut inatsimmi pilersuisussaatitaaneq atorunnaarsinneqarpoq. Aappallit pilersuisussaatitaajunnaarpata soraarnerussutisianut ataatsimut isigalugu qanoq kinguneqassanersoq pillugu Naleqqamit paasiniarneqartuartarsimagaluarpoq.
- Kinguneri takullugit uggornarpoq. Pilersuisussaatitaaneq atorunnaarsinneqarpat utoqqalinersiallit ilaasa utoqqalinersiaasa ikilinissaat Naalakkersuisut isumaliutersuutigisimaneraat oqallinnermi apeqqutiginikuuarput. Suliaq tamanut pitsaanerpaamik kinguneqartillugu suliarineqannginnera uggornarpoq, Naleqqami oqaaseqartartoq, Jens Napaattooq, oqarpoq.
Maanna saaffiginnittartut amerliartuinnarnerat pissutigalugu kommunip kinguneri malugisinnaavai.
Palle Jerimiassenip erseqqissarpaa utoqqalinersiallit eqqugaasut aningaasatigut tapersersorneqarnissaat kommunip misissoraa. Aamma erseqqissarpaa, Naalakkersuisut utoqqalinersianik tunniussineq qanittukkut iluarsinngikkunikku, tamanna kommunimut aningaasartuuteqarnerulersitsissasoq.
- Isumaqarpunga utoqqalinersiutit pillugit aaqqissuusseqqinnermi
eqqornerluisinnaaneq takunngitsoorneqarsimasoq, neriuppungalu Naalakkersuisut aamma Namminersorlutik Oqartussat equngassut tamanna ulluni qaninnerpaani iluarsissagaat, borgmesteri Palle Jerimiassen oqarpoq.
Isornartorsiuineq pillugu Naalakkersuisut oqaaseqartinniarlugit Sermitsiaq.AG-p sulissutigaa.