Kommune Kujalliup naatsorsuutai akuerineqartut

Kommunip 2019-imut naatsorsuutai kommunalbestyrelsip pingasunngormat akuersissutigai. Kommunimit 10,8 millioner koruuninik sinneqartoorluni angusaqarneq naammaginartutut isigineqarpoq.

- Kommunimi ingerlatsiviit aningaasaqarnerminnik ingerlatsilluarsimanerat kinguneqarluarpoq, taamaammat kommunimi atorfillit tamaasa ataatsimiititalianilu ilaasortat 2019-imi sulilluarsimanerannut qutsavigingaarpakka, borgmesteri Kiista P. Isaksen nalunaaruteqarnermi oqarpoq

Borgmesterip aamma inuussutissarsiuteqartut innuttaasullu qujaffigai:

- Kommune Kujallermi illoqarfittatsinni nunaqarfittatsinnilu innuttaasut, nammineq kajumissutiminnik suliaqartartut, inuussutissarsiortut matumanilu inuussutissarsiorneq eqeersimaartoq kommunip siunissamut takorluugaasa iluatsinnissaannut tunngaviupput, taamaammat ataatsimoorluta ineriartortitsiniarnitsinni suleqatigiilluarnitsinnut qujanakulooq, Kiista P. Isaksen oqarpoq.

Kommunip naatsorsuutaani takuneqarsinnaavoq, 613 millioner koruuninik isertitaqarsimaneq. Taakkunannga 256 millioner koruunit inuit isertitaasa akileraarutaanneersuupput, 351 millioner koruunillu tapiissutineersuullutillu nalimmassaanermeersuusut.

Kommuni sanaartornermi 52 millioner koruuninik aningaasartuuteqarsimavoq. Annertuumik aningaasartuutaasimasut ilagaat isumaginninnermut tunngassuteqartut, tassani kommunip 237 millioner koruuningajalluinnaat, atuarfeqarnermut, meeqqeriveqarnermut eqqaavilerinermullu atorsimavai, tassa Kommune Kujalleq 175 millioner koruuningajalluinnarnik atuisimavoq.