kommuninut qinersineq 2017
Kommune Kujallermi tupaallatsitsisoq
Kommuneq Kujalermi Kiista P. Isaksen (S) taaguunneqarluartoq. Taamaasilluni Jørgen Wæver Johansenimit Simon Simonsenimillu inuttut taaguunneqarnermi ajorsarterujussuarlugit.
Kiista P. Isaksenip Kommune Kujallermi borgmesteriusimasoq Jørgen Wæver Johansen paarlassagunarpaa. Qinersisoqannginnerani ilimagineqarsimangaluarpoq, borgmesteriungallartoq Jørgen Wæver Johansen (S) aammalu borgmesteriusimasoq Simon Simonsen (S) immaqalu Inuit Ataqatigiinneersoq Stine Egede taakku arlaat ajugaassasoq, Kiista P. Isaksenilu tupaallaatsitserujussuarpoq.
Inuttut taaguunneqarnerit 450-it
Maannamut kisitsisisaangallartut takutippaat Kiista P. Isaksen inuttut 450-init taaguunneqarnerpaalluni ilimagineqartunit ajugaarujussuartoq. Jørgen Wæver Johansen 207-nik taaneqarpoq, Simon Simonsen 261-it Stine Egedelu 312-nik qinerneqarluni.
2013-imi kommunimut qinersinermi, Jørgen Wæver Johansen 297-nit taaguunneqarpoq Simon Simonsenilu 282-init. Ilimagineqarsinnaavoq Kiista P. Isaksenip taakku ullumi qinersisaanik arsaarsimangai.
Sermitsiaq.AG-iip, Kiista P. Isaksen killitsisimaartoq pissarsiarisimavaa.
- Maanna nuannaaqaanga pissangallungalu, kisitsisit inerniviusut takunissaat qilanaarivara. Uannut taasisimasut assut qujassuteqarfigerusuppakka, Kiista P. Isaksen oqarpoq.
Isumaginninnermut siunnersortitut ilinniarsimasoq
Kommune Kujallermi borgmesterinngortoq 44-nik ukioqarpoq, 1994-imilu isumaginninnermut siunnersortitut ilinniakkaminik naammassinnissimasoq. Siullermik Narsami 2001-imi kommunalbestyrelsimut qinigaaqqaarpoq ukiulli sisamat qaangiummata borgmesterinngorsimalluni.
Kommunit kattussuunnerisa kingorna borgmesterimut sinniisuusimavoq. Kiistap qineqqusaarnermi tupaallaatigineqartumik ajungaanerminut nassuiaataasinnaasumik immikkut iliuuseqarsimanani isumaqarpoq.
- Qineqqusaarnermi siunnersuutikka anguniakkakkalu ersarissimapput, qinersisartut immaqa tamanna aallaavigisimavaat. Allanik siunnersuuteqarpunga taakkuli innuttaasunik isumaqataaffigineqarput. Misigisimavunga innuttaasut piumasaat paasisimallugu. Tamanna nuannaarutigaara. Tamanna ajugaarujussuarninnut patsisaasinnaavoq, Kiista P. Isaksen oqarpoq.
- Qinersinerup inernera qanoq ikkaluarpalluunnit akisussaaffimmik tigusinissara sillimaffigisimavara. Ilaasortaangaluaruma, borgmesterimut sinniisussaangaluaruma borgmesteriungaluarumaluunnit, Kiista oqarpoq.
Oqaluinnarani iliuuseqarsinnaaneq
Kiista P. Isaksenip innuttaasut kissaataat malillugu kommunip ataatsimoortinnissaa partiit akimorlugit sulissutiginiarpaa.
- Uannut pingaarnerpaavoq illoqarfinni nunaqarfinnilu innuttaasut suleqatigalugit kivitseqatigiinnissaq. Taamaammat pingaartitama ilagaat kommunemi qinisisartut tamaasa tikeraartarnissaat. Neriorsuutikka aallaavigalugit sulinissara pingaartippara, Kiista oqarpoq. Kommune Kujalliup innuttaasuni kommuneqarfimmi angerlarsimaannarnissaat akiorniarsaraa. Qineqqusaarnermilu tamanna eqqartorneqangaatsiarpoq, tamarmillu isumaqatigiissutigaat ajornartorsiut iliuuseqarfigineqartariaqartoq.
- Pingaaruteqarpoq uterlutik angerlartut angerlarsimaffissaqartinnissaat, aammalu suliffissaqarfiusuni inuttunerusartoq nalunngilarput. Assersuutigalugu ilinniarluarsimasunik peqarpugut, piginnaasaallu qaffasippallaarnerat pissutigalugu suliffittaarsinnaanngitsunik kingunerisarpaalu kommunimut allamut ilinniakkaminnut naleqquttumik suliffissarsiortarnerat. Taamaammat pingaaruteqarpoq taakkununnga naleqquttunik suliffinnik pilersitsinissaq. Pingaaruteqarpoq Namminersornerullutik Oqartussat kommunit kattussuunneranni suliffeqarfinnik nuussuinnissaq siunertarineqartut annersaasa ilagisaat piviusunngortinneqarnissaa, Kiista P. Isaksen oqarpoq.