Kommune Kujallermi kommunalbestyrelse immikkut ittumik ataatsimiilersoq
Kommune Kujalleq ullumi tallimanngornermi immikkut ittumik ataatsimiilluni 2022-mut missingersuutit siullermeerneqarnerat naammassiniassavaa. Juunip naanerani kommunip missingersuutai 17,5 millionit koruuninik sinnerneqarsimapput.
Kommunalbestyrelsimut ilaasortat ullumikkut nalunaaqutaq 13.00-imit 14.30-mut immikkut ittumik ataatsimiinnerminni missingersuutit tamakkiisut misissussavaat aamma
ataatsimiititalianut arfiniliusunut aningaasartuutissatut killiliussassat aalajangersassallugit.
Kommunalbestyrelsip missingersuutit siullermeerluni septembarip 22-anni oqaluuserai naammassinagilli, taamaattumillu ullumikkut ataatsimiinnerminni nangeqqissallugit.
Kommune Kujalliup aningaasaqarnera ima ilungersunartigaaq, kommunip aningaasaqarnermut ataatsimiititaliaata ilaatigut aalajangiussimallugu atorfinitsitsinerit tamaasa unitsikkallarniarlugit, angalanerit pisariaqanngitsut tamaasa taamaatinniarlugit allaffeqarfimmilu qaangiuttoornerit tamaasa unitsinniarlugit.
Kommunip 2021-mi januaarimit apriilimut innuttaasut 45-t annaavai aamma 2021-mut missingersuutinik qaangiuttuungaatsiarnini ilungersuutigalugu.
Apriilimi qinersinerup kingorna missingersuutit 13,5 millionit koruuninik sinnernerneqarsimapput, aamma juunimi missingersuutit sinnerneqarnerat 4 millionit koruuninik amerleriaateqarlutik.
-Sukannersumik ingerlatsinissap ukiup sinnerani ingerlanneqarnissaa allaqqunneqarsinnaanngilaq, taamaaliunngikkuttami aappaagu aningaasaqarnitsinnut aamma sunniuteqarnerluttussaavoq. Taamaammat piffissaagallartillugu aningaasaqarnermut sukannersumik aqutsinissaq aalajanfgiupparput, borgmester Stine Egede (IA) juulip naanerani tusagassiuutinut nalunaarummi oqarpoq.
Borgmesterilli Stine Egedep taamani nassuiaalluni oqaatigaa, atorfinitsitsinernik unitsitsigallarnerup kinguneranik ukiup sinnerani atorfinitsitsinngitsuuinnermik kinguneqarnavianngitsoq.
Kommunip kommunaldirektøri nutaaq, Tine Pars aggustip aallaqqaataanni atorfinitsippaa, kommunilu suli ingerlatsivinni ukunani pisortaqarallarluni, tassa teknikimut avatangiisinullu ingerlatsivimmi, isumaginninnernut ingerlatsivimmi, atuarfeqarnermut meeqqerivinnullu ingerlatsivimmi aamma inuussutissarsiornermut sulisoqarnermullu ingerlatsivimmi.