Kommune Kujalleq: Piumasaqaatit kissaatillu pillugit suli isumaqatiginniutissaqarpoq
Kujallermi isumaqatigiinniarnerit suli ingerlapput. Naatsorsuutigineqarsinnaavorli isumaqatigiissut sapaatip akunnerata tulliani atsiorneqarsinnaajumaartoq.
Kommune Kujallermi partiit pingasut kommunalbestyrelsemi issiasuutitaqartussat suli isumaqatiginninniarnermi peqataapput. Borgmesterinngortussaq nassuiaavoq oqaloqatigiinnerit suli ingerlasut, taamatullu partiit kissaataat piumasaallu suli isumaqatigiinniutigineqartut. Isumaqatigiissut sapaatip akunnerata tulliani naammassisimanissaa naatsorsuutigineqarsinnaavoq.
- Suli inissitassaqalaarpoq isumaqatigiissummik atsiortoqannginnerani. Suli attaveqatigiinnerit ingerlapput, aamma partiit tamattaalluta kissaatigisagut piumasaqaatigullu isumaqatiginniutigissagatsigit suli, Stine Egede Sermitsiaq.AG-mut nassuiaavoq.
Taanna Nuummukassaaq Inatsisartuni ilaasortanngoriartorluni. Malittarisassat malillugit ilaasortatut ivertinneqareeruni aatsaat sulinngiffeqarnissamik qinnuteqarsinnaagami. Arfininngorpat Qaqortumukaqqissaaq.
- Inatsisartuni ilaasortatut ivertinneqareeruma aatsaat sulinngiffeqarnissamik qinnuteqarsinnaavunga. Tamannalu piaarnerpaamik isumagissavara, oqarpoq.
Naammassingajalersut
Taassuma naatsorsuutigaa Kommune Kujallermi suleqatigiinnissamut isumaqatigiissut sapaatip akunnerata tulliani naammassillugu atsiorneqarsinnaajumaartoq.
Inatsisartuni malittarisassat malillugit siulittaasoqarfimmi ilaasortassat inissititerneqareerpata aatsaat sulinngiffeqarnissamik qinnuteqartoqarsinnaavoq. Siulittaasoqarfik inissititerneqassaaq Inatsisartut inissititertumik tallimanngorpat ataatsimeereerpata.
Stine Egede kommunimut qinersinermi 410-nit taaneqarpoq, Inatsisartunullu qinersinermi 133-nit taaneqarluni. Sulinngiffeqassalluni aalajangereerpoq Kommune Kujallermi borgmesteritut atorfik aallukkusukkamiuk.
Qeqqata Kommunia, Kommuneqarfik Sermersooq aamma Avannaata Kommuniani suleqatigiinnissamik isumaqatigiissusiortoqareerpoq. Kommune Qeqertalik aamma isumaqatigiissummik naammassinnilluinnalerpoq. Kommune Kujalleq kisiartaalluni maanna isumaqatiginninniarnernit ingerlatsisuuvoq.