Inuit Ataqatigiit Demokraatillu suleqatigiilersimanerisa malitsigisaanik, Demokraatit ataatsimiititaliami siulittaasuuffigisaqalersut, Kommune Kujallermit tusagassiuutitigut nalunaarut aqqutigalugu ilisimatitsissutigineqarpoq.

Meeqqeriveqarnermut, ilinniartitaanermut, suliffeqarnermut, kultureqarnermut sunngiffimmullu ataatsimiititaliaq matumani pineqarpoq.

Ataatsimiititaliap siulittaasua nutaaq, Margrethe Thårup Andersen (D), kissaateqarpoq Kommune Kujallermi ataatsimoorluni ineriartortitsisoqasssasoq nutaamillu eqqarsaqatigiittoqassasoq kommunip nukiisa pitsaasumik atorneqarnissaat siunertaralugu.

- Taamaammat ataatsimiinnerit tullissaanni, suleqatigiinnissamik isumaqatigiissut tunngavigalugu oqaluuserisassatut siunnersuummik saqqummiussivugut, tassanilu ataatsimiititaliamit politikkikkut anguniakkat oqaluuserineqassapput, aammalu aqutsisut Narsarsuarmi ataatsimiinneranni saqqummiussisoqassalluni.

Suleqatigiinneq pitsaasoq tatigeqatigiinnermik aallaavilik

Ataatsimiititaliap siulittaasortaarnerata saniatigut aamma 1. juli atuutilersumik suliassaqarfimmi ingerlatsivimmut pisortatut atorfinitsinneqarnikuuvoq Kattie Egede Motzfeldt.

Taanna perorsaanermi masteritut ilinniarsimasuuvoq aamma ilinniartitsisutut, atuarfimmi pisortatut aammalu sunngiffimmi sammisassaqartitsinermi pisortatut sulinermik misilittagaqarpoq. Ingerlatsivimmi pisortaq aammalu ataatsimiititaliap siulittaasortaava suleqatigiinnerminnik aallartitsilluarsimallutik unnersiorput:

- Suleqatigiinnerput aallarnerlugu Kommune Kujallermi nunaqarfiit illoqarfiillu tamaasa Ataatsimiitsitaliaq peqatigalugu tikippavut, piffiit qanimut takullugit inuilu oqariartuutai tusareerlugit siunnerfissarput pilersaarusiuleruttorparput, taakku unnersiorput.

- Alloriarnerup tullia tassaassaaq ingerlatsivinni ataatsimiititaliap attuumassuteqarfigisaani aqutsisut Narsarsuarmi qaammatip matuma ingerlanerani naapeqatigiinnissaat.