Kujalleq

Kommune Kujalleq meeqqat siunnersuisoqatigiivinik pilersitsivoq

Kommuni Naalakkersuisullu ukiuni pingasuni atuuttussami isumaqatigiissusiorpoq

Kommune Kujallermi meeqqat maanna ersarissumik tusaaneqarnissaminnut periarfissaqalerput.

Meeqqat siunnersuisoqatigiit
Kommuni ukiuni pingasuni atuuttussamik Naalakkersuisullu isumaqatigiissuteqarput, tassani meeqqat siunnersoqatigiiffiit, Meeqqat Isummersorfii, pilersinneqassapput aamma pisinnaatitaaffiit pillugit siunnersoqatigiiffiit Nakuusaaqqanik taaneqartut pilersinneqarnissaat siunertarineqarpoq.

Siunnersuisoqatigiit Nakuusap suliniutaanut 'Uagut ulluinnarput uagut niperput'-mut atatillugu pilersitsisoqarpoq. Siornatigullu Qeqqata Kommunia aamma Kommuneqarfik Sermersooq assingusunik Naalakkersuisunut isumaqatigiissuteqarnikuupput.

Isumassarsiatsialaat
Kommunini Meeqqat Isummersorfii inuusuttuaqqanik 13-18-it tungaanut ukiulinnik inuttaqassapput, taakkulu kommunalpolitikerinut Inatsisartunullu siunnersuuteqartartussaapput.

Atuarfinni Nakuusaaqqat amerlanertigut atuartunik annernik inuttaqartinneqassapput, taakkulu nunatsinni meeqqat tamaasa sinnerlugit oqaaseqartartuussapput

Atuaruk: Politikkimi uummarissaaniarlutik meeqqat isummersorfiannik pilersitsiniartut

Ilusilersueqataaneq
- Kommune Kujallermut pingaaruteqartorujussuuvoq meerartatta inuusuttortattalu ajunnginnerpaamik atugassaqartitaanissaat qulakkeersimassallugu, taamatuttaaq pingaaruteqarpoq namminneerlutik ulluinnarni qanoq atugassaqartitaanertik pillugu ilusilersueqataanissaat qulakkiissallugu, naatsorsuutigilluinnarparalu suliniut manna Kommunip meeqqanut inuusuttunullu politikkianut pitsanngorsaataassasoq, borgmesteri Jørgen Wæver Johansen oqarpoq.

Nakuusa Kommuni Kujalliup ilinniartitsisuinik aprilimi pikkorissaapput, ukiorlu uani atuarfiusumi kujataani atuarfiit taamaalillutik Nakuusaaqqanik aallartitsisinnaanngorlutik.

Powered by Labrador CMS