Kommune Kujalleq maanna inuussutissrsiornermut siunnersuisoqatigeeqalerpoq
Qaqortumi kommunep ataatsimiittarfiani siunnersoqatigiinnik pilersitsiniarluni ataatsimiinneq Narsamiit Nanotalimmiit kujataanilu inoqarfinniit allanit attaveqqatit oqarasuaatillu atorlugit peqataaffigineqartoq pilersitiffiuvoq.
Inuussutissarsiornermut siunnersuisoqatigiit tallimanngormat pilersitsilluni ataatsimeersuarneratigut pilersinneqarput.
Ataatsimiinnermi peqataasut Rasmus Christian Rasmusen siunnersoqatigiit siulittaasussaattut qinerpaat. Borgmester Kiista P.Isaksenip peqatigalugu ilaasortanngortut tassaapput, Poul Erik Frederiksen Nanortalimmiit, Johan Arne Fleischer Qaqortumiit, Pavia Fontain Narsamiit aamma Storch Lund Narsarsuarmiit.
Ineriartortitsinissamut pilersaarut pingaarnersaasoq
Inuussutissarsiornerup suliffissaqartitsinerullu ineriartornissaanut pilersaarusiornissaq siunnersoqatigiit suliasaasa pingaarnersaaraat.
- Borgmesterinngoramali pingaartituaannarsimavara siunertariuuaannarsimallugulu ataqatigiittumik ineriartortitsinissaq, taamaattumik nuannaarutigingaarpara Nanortalimminngaanniit, Qaqortumiit, Narsamiit aamma Narsarsuarminngaanniit ilaasortalimmik siunnersuisoqalernerput, borgmester Kiista P. Isaksen oqarpoq.
Siunnersoqatigiit siuitaasussaattut qinerneqartoq ukiuni kingullerni 35-ni Qaqortumi najugaqarnermini suliffeqarfinnik ingerataqartarpoq, ullumikkullu suliffeqarfik 60º North nuna tamakkerlugu sullissisoq ingerlataralugu.
Sulinissamut piareersimasoq
- Kujataani ineriartornerup ilorraap tungaanut saatinnissaa pingaartittorujussuuara, tamannalu suliffeqarfiutillit aqutisullu qanimut suleqatigiilluarnerisigut pisinnaavoq. Siunnersuisoqatigiinni sulinissara pissanganartutut isigigaara, sulinissannullu piareersimalluarlunga, Rasmus Christian Rasmussen naggasiivoq.