Kujalleq
Kommune Kujalleq isumaginninnerup tungaatigut ikiortissarsiorpoq
Isumaginninnermut tunngatillugu sulisunik sullissisunik annertuumik amigaateqartoqarpoq. Namminersorlutik Oqartussallu tapersiinera naammanngerujussuarpoq, Kommune Kujallermi isumaginnermut ataatsimiititaliami siulittaasoq aarlerisaarivoq
Kommune Kujallermi isumaginninnermi assorsuaq ajornartorsiuteqartutut tusagassiorfitsigut piffissami kingullermi saqqummiunneqartarpoq. Tamatumalu saniatigut ikiuiartortunik misissuiartortunillu Namminersorlutik Oqartussaniit takkuttoqartarpoq.
Unammilligassat annertoorujussuit
Kommunillu tusagassiuutinut nalunaarummi nassuerutigaa, isumaginninnermi suliassaqaqalutik, suliassallu taakku ullut tamaasa sulisunit suliarineqartartut.
- Kisiannili isumaginninnermi ilinniarsimasunik sulisussarsiorneq kommunimit assorsuaq ajornartorsiutigineqarpoq. Tamatumalu saniatigut nuna tamakkerlugu isumaginninnermi siunnersortit assut amigaatigineqarput, taamaammallu piffissami qaninnerusumi kommunimi isumaginninnermi siunnersortitut atorfiit inuttalerneqarnissaat ilimanaateqanngilaq, isumaginninnermut ataatsimiititaliami siulittaasoq, Karla E. Bisgaard erseqqissaavoq.
Isumaginninnermut pisortaqanngitsoq
Kommune Kujalleq piffissami sivitsortumi isumaginninnermi pisortaqarsimanngilaq. Taamaammat kommuni makkuninnga suliniuteqalerpoq:
- Namminersorlutik Oqartussaniit ikiortissarsiorpoq, kommunilu nalunaarpoq isumaginninnermi siunnersortit 4-5-it minnerpaamik qaammatini 3-4-ini pisariaqartinneqassasut.
- Atorfiit inuttaqalerlutik ikiorteqarnerup pisariaarunnissaata tungaanut Århus Kommunep sulisunik ilinniarsimasunik kommunit attartortitsinissaanik isumaqatigiissuteqarfigineqarpoq.
- Sulisunik pissarsiumalluni, sulisut pigiinnarumallugit kiisalu sulisut ilinniaqqittarnissaat anguniarlugu iliuusissanik pilersaarusiorpoq.
Sapaatip akunnerini marlunni ikiorneqartut
Namminersorlutik Oqartussat isumaginninnermi nakkutilliisoqarfiat nalunaarpoq kommunimi isumaginninnermi suliassat ikilisarneqarnissaannut ikiuunniarlutik, tassa isumaginninnermi suliassalerisut marluk ulluni 14-ini sulissasut.
Namminersorlutik Oqartussat ikiuinerat naammaqqajanngilaq, tassami suliassat amerlalluinnarnerat ilinniarsimasunillu amigaateqarnerujussuaq eqqarsaatigalugit pisariaqartitsineq annerujussuuvoq.
Toqqissisimananngitsoq
- Pisumi matumanerpiaq namminersorlutik oqartussat ikiuunnissaminnik neqeroorutaat toqqissisimanartutut isiginngilara. Innuttaasunimmi neriulussinnartitsissaaq, suliassallu ullut 14-it ingerlanerinnaanni naammassineqarnavianngimmata isumaginnittoqarfik pillugu naammagittaalliornernik nassataqaannassalluni. Utaqqiisaanarmik sivikitsumillu aaqqiinermut taarsiullugu isumaginninnermi suliassat ilinniarsimasunit ataavartumik suliarineqartarnissaat Kommune Kujallermit pisariaqartinneqarpoq. Taamaammat Århus Kommunemut isumaqatigiissupput isumalluarfigineruara, Kommune Kujallermi isumaginninnermut ataatsimiititaliap siuliuttaasua Karla E. Bisgaard oqarpoq.