Qeqertarsuaq
Kommune: Greenland Spring Waterip tunisassiorneq Nuummut nuunniarpaa
Qaasuitsup Kommuniata Namminersorlutik Oqartussanut erseqqissarpaa, nuussinikkut suliniummut tamarmut tunngaviit nikisinneqassasut
Ilumoorpa schweizimiut ingerlatsiviata Greenland Spring Walterip Uunartuarsuup puilasuanit imermik Qeqertarsuarmi fabrikkimi tunisassiornini unitsinniaraa, tunisassiornerlu Nuummut nuullugu?
Qaasuitsup Kommunia Inuussutissarsiornermut, Sulisartoqarnermut Niuernermullu Naalakkersuisoqarfimmut allakkamigut aperivoq.
Paasissutissat nutaat
Kommunip allannguutissat pillugit paasissutissat pissrsiarereersimallugit taamatut apeqquteqarpoq.
Ilumoorpat fabrikki imermik puiaasanut plastikkinut immiullugit tunisassiortarunnaassasoq, imerli nassiutiinnartalissallugu, illoqarfimmi suliffissaqarnermut tunngavissaarutissaaq.
– Qaasuitsup Kommuniata oqaatigissavaa paasissutissat ilumoorpata, tamanna Qeqertarsuarmi suliffinnik pilersitsinissamik neriorsuummut tunngavissanik saneqqutaarineruvoq, borgmesterip tullia Jess Svane pisortaanerlu Hans Eriksen allakkaminni allapput.
Maskiinat nutaat
Tamatuma saniatigut allakkani allassimavoq naalakkersuisoqarfik marsimi paasissutissiisimasoq fabrikki maskiinanik maqiterissutinik nutaanik ikkussuiniartoq, maskiinatoqqat ukiup ataatsip matuma siornatigut aallarunneqarnerisa kingorna.
Ilanngullugu Namminersorlutik Oqartussat naatsorsuutigisimavaat ukioq manna tassani puiaasanik katillugit 700.000 lilterinut tunisassiortoqassasoq.
– Taamaattumik Qaasuitsup Kommuniata nassuiarneqaqquvaa atuinissamut akuersissummik nutaamik tunniussisoqarsimanersoq, imaluunniit Greenland Spring Water puilasumit tunisassiornissamik akuersissumminik arsaarneqarsimanersoq. Naalakkersuisoqarfimmullu pingaartumik isummerfigeqquneqarput siusinnerusukkut tunngavissatut nalunaarutigineqarsimasut, aammalu tunisassiornermut suliassaqartitsinermullu paasissutissat, allakkani allassimavoq.
Isornartulik
Namminersorlutik Oqartussat suliniummik nakkutilliinerat kommunip sivisuumik isornartoqartissimavaa.
Taamaasilluni tunisassiorneq annikitsuinnaasimavoq, Greenland Spring Waterillu 2009-mi puilasumit tunisassiornissamik kisermaassisuunissaanik akuerineqarnerata kingorna naatsorsuutigisat, imaluunniit Namminersorlutik Oqartussanik isumaqatigiissut, naammassineqarsimanngilluinnarput. Isumaqatigiissut 2029-p tungaanut atuuppoq.
Inuussutissarsiornermut, Sulisartoqarnermut Niuernermullu Naalakkersuisoqarfiup siusinnerusukkut Sermitsiamut oqaatigisimavaa ingerlatsivik 2014-imi imermik puilasumik katillugit 75.500 liiterimik tunisassiorsimasoq, tamannalu Landskarsip akitsuutitigut 7.550 koruuninik isertitsissutigaa.
Tyskit tikisitat
Kisitsisit akuersissutqarnermi isumaqatigiissutaasimasumit allaanerulluinnarput, tassa Greenland Spring Walter puilasup ernganik ukiumut 7 millioner liiterimik tunisassiortartussaagaluarmat. Naalakkersuisoqarfillu naapertorlugu ingerlatsivik 2015-imut akuerineqarsimavoq annikinnerpaamik tunisassiassat ikilisinnissaanut, taamaasilluni ukioq manna tunisassiassaq 700.000 liiteriulluni.
Tamatuma saniatigut Greenland Spring Waterip ingerlatsineranik Sermitsiap apriilimi allaaserisaani atuarneqarsinnaavoq tyskit tunisassiorfiata Kronesip, ukiuni kingullerni puiaasanut imermik maqitsineq ingerlassimagaa.
Ingerlatsiviup tyskit sulisartut Qeqertarsuarmut timmisartuuttarsimavai, ukiumut sapaatip akunnerini sisamat missaanni imermik maqitsilluni tunisassiornermi sulisikkiartorlugit. Krones naapertorlugu imermik maqitsilluni tunisassiornermi ilinniarsimasunik Qeqertarsuarmi sulisussaqarsimanngilaq.