Kommune eqqakkanik ingerlatseqatigiiffimmut peqataajunnaarniartoq
Avannaata Kommuniata nuna tamakkerlugu eqqakkanik ingerlatseqatigiiffimmik, Esani A/S-imik, pilersitseqataaneraniit qaammatit qulingajaat ingerlareersullu kommunalbestyrelsi aalajangerpoq ingerlatseqatigiiffimmut peqataajunnarniarluni
Kalaallit Nunaat tamakkerlugu eqqakkat suugaluartulluunniit avatangiisinut illersorneqarsinnaasumik katersorneqartalernissaannik iginneqartalernissaannillu anguniagaq ukioq manna februaarip 21-ani piviusuunngortinneqarpoq, nunatsinni kommunit tallimaasut ingerlatseqatigiiffik Esani A/S pilersimmassuk.
Maanna qaammatit qulingajaat ingerlareerneranni Avannaata Kommunia aalajangersimavoq ingerlatseqatigiiffimmut eqqakkat kommuninit tallimanit tamaneersut Sisimiuni Nuummilu ikuallaavinnut assartorneqartalernissaannik siunertaqartumut peqataajunnaarniarluni.
Akisoorujussuusoq
- Suut tamarmik ingerlallualernissaannik neriorsorneqarpugut. Pissusiviusunili tamanna uatsinnut akisoorujussuusoq paasinarsivoq, borgmester Palle Jerimiassen aalajangerneq pillugu Sermitsiaq.AG-mut oqarpoq.
Taanna erseqqissaalluni oqarpoq, eqqakkanik ajornartorsiutini Avannaani pissutsit immikkuullarilluinnartut ingerlatseqatigiiffimmut nutaamut atatillugu sillimaffigineqanngilluinnarsimasut.
- 23-nik nunaqarfeqarpugut sisamanillu illoqarfeqarluta, taakkualu ilarpaalussui avinngarussimasorujussuarmiipput, ukiullu ilarujussuani sikoqartorujussuusarnerata kinguneranik eqqakkanik assartuisarnissaagaluaq pisinnaajunnaarsinneqarsimalluni, borgmesteri oqarpoq.
- Tamatuma peqatigisaanik maluginiarsimavarput, eqqakkanut toqqorsivinnik sanaartorneq atortussanillu assigiinngitsunik pisiortorneq nammineerluta isumagisussaagipput. Tamatumunnga aningaasartuutinik takkuttoqarnissaa takusimanngilarput, nassuiaavoq.
Najukkami ikuallaasarneq
Taanna isumaqarpoq, nunaqarfinni containerinik ikuallaaveeqqanik pilersitsineq Avannaata Kommunianut sunniuteqarnerujussuullunilu akikinnerujussuussasoq.
- Ullumikkut eqqakkat poortortartussaavavut umiarsuarmillu nassiunneqarsinnaalernissaannut toqqortarisartussallugit. Tamanna sumiiffiit ilaanni nunaqarfimmiut tipimiusorujussuusarnerannik ajornartorsiutinik pilersitsisarpoq, borgmesteri erseqqissaavoq.
Kommunit tallimat piginneqataassutitut 2 millioner koruuninik aningaasaliissuteqarsimasut Esani A/S-ip pilersinneqarneranut tunuliaqutaapput. Siulersuisut siulittaasuat tassaavoq kommunaldirektør Lars Møller-Sørensen, pisortarlu tassaalluni Frank Rasmussen.