Kommunaldirektøriusimasumut ajunngitsorsiassaqartitsineq pillugu naammagittaalliuut suliarineqarunnaarpoq
Nunamut namminermut immikkoortortaqarfiup Kommuneqarfik Sermersuumi pisortaasimasoq soraarnermigut annertuumik ajunngitsorsiassaqartinneqarnera pillugu naammagittaalliuut suliaralugu unitsippaa, taamaakkaluartoq eqqartuussissuserisumit allakkani pisortaanerup isumaqatigiissusiorsimanera pillugu sualuttumik pasilliuteqartoqarpoq.
Kommuneqarfik Sermersuumi borgmesteriusimasoq Charlotte Ludvigsen (IA) pillugu naammagittaalliuut Namminersorlutik Oqartussani Nunamut Namminermut Immikkoortortaqarfimmit suliarineqarunnaarpoq. Tamanna allagaatit Sermitsiaq.AG-p pissarsiarisimasai takutippaat.
Taamanikkut kommunaldirektøriusup Lars Møller-Sørensenip soraarsitaaneranut atatillugu borgmesterip iliuuserisimasai naammagittaalliuutigineqarput.
2021-mi aasakkut soraarpoq 1,3 milliuunit koruunit sinnerlugit soraarnermi ajunngitsorsiassalerneqarluni.
Ajunngitsorsiassanut isumaqatigiissut juulip tallimaani atsiorneqarpoq, tassa Lars Møller-Sørensenip kommuni sinnerlugu siunnersortitut suliffeqarfimmut isumaqatigiissutaanut sakkortuumik pasilliuteqartoqarnera pillugu Kommuneqarfik Sermersuup eqqartuussissuserisumit allagarsineranit ullut marluk qaangiunneranni.
Eqqartuussissuserisoq isumaqarpoq sulisut isumaqatigiissusioqataasimasut atuuffimminnik annertuumik sumiginnaasimasut, suliffimmiillu soraarsitaanermik tamanna kinguneqarsinnaasoq.
Politikeri illuatungiliisoq naammagittaalliorpoq
Tamanna pissutigalugu kommunalbestyrelsimi Siumup gruppiani siulittaasuusimasoq Inga Dora G. Markussen Namminersorlutik Oqartussani nunamut namminermut immikkoortortaqarfimmut naammagittaalliorpoq, borgmesteriusimasoq Charlotte Ludvigsen suliami iliuuserisimasai pillugit.
Nunamut namminermut immikkoortortaqarfiup Charlotte Ludvigsenip Lars Møller-Sørensenimik soraarsitsinissamik isumaqatigiissuteqarsimanera kommunimut aningaasatigut annaasaqaataanersoq nalilerpaa.
Nunamut namminermut immikkoortortaqarfiup paasissutissat tamaasa pissarsiarinissaat piumasarisimavaa, inerniliunneqarporlu nunamut namminermut immikkoortortaqarfiup “qulakkeerlugu paasisinnaasimanngikkaa borgmesteriusimasoq allakkap 3. juli 2021-meersup imarisaanik qanoq ilisimasaqartiginersoq imaluunniit borgmesteriusimasoq suliamut atatillugu qanoq siunnersuunneqarsimanersoq juulip 5-ani 2021-mi soraarnermut isumaqatigiissummik suliaqartigani".
Iliuuseqarnerussanngilaq
Nunamut namminermut immikkoortortaqarfik nangilluni allappoq:
- Kommunip Nunamut Namminermut Immikkoortortaqarfik ilisimatitsissutigaa allakkiaq 3. juli 2021-meersoq soraarnermut isumaqatigiissuteqarnermut ilaatinneqanngitsoq.
- Tamakku tunngavigalugit Nunamut namminermut immikkoortortaqarfimmit nalilerneqarpoq suliami iliuuseqarnerunissamut tunngavissaqanngitsoq.