Kommunaldirektøri: NCD-mik kanngunartuliaq kommunimi suliassanut pingaarnernut sunniuteqassanngilaq

Kommuneqarfik Sermersuumit neriuutigineqarpoq illoqarfimmi ineriartortitsinissamik ingerlatseqatigiiffik NCD pillugu suliaq inaarneqarsinnaaqqullugu 1,25 milliard koruuninik taarsigassarsinissamut Naalakkersuisunit akuerineqassallutik. Kommuni ingerlatseqatigiiffik aqqutigalugu sanaartukkanik arlalissuarnik, aningaasalersorneqarnissaat inissinneqarsimanngitsunik, aallartitsisimavoq.

Kommunaldirektør Ole Jakobsen Sermitsiaq.AG-mut oqarpoq, taarsigassarsianut amerlasuunut taakkununnga naafferartumik akilersuinermit kommunip aningaasaqarnerata artukkerneqarnissaa naatsorsuutigineqanngitsoq. Naafferartumik akilersuineq pingaarnertut suliassanik soorlu meeqqat atuarfiannik ingerlatsinermik utoqqarnillu isumassuinermik eqquinavianngilaq:

- Illunik napasoqarpoq aningaasalersussallugit pisussaaffeqarfigisatsinnik, aningaasalersorneqarsinnaapput pingaarnertut suliassatsinnut sunniuteqanngitsumik. Missingersuutini sipaarniartoqanngilaq, politikkikkullu kissaatit inissinneqarnissaat inissaqartinneqarsimavoq, Ole Jakobsen oqarpoq, taassumalu kommunimi missingersuutit ajunngitsumik inissisimasut oqaatigaa.

Taarsigassarsinermi aningaasaqarneq pillugu kommunaldirektøri nassuiaavoq, taarsigassarsinikkut missingersuutit pilersaarutaaqqaarsimagaluartunut inissaqartitsilissasut, tamatumani kommunip ulluuneranik paaqqinnittarfiit arlallit aamma atuarfik NCD-mit attartortussaasimagaluarlugit:

Ukiunut 30-nut taarsiullugu 25-t

- Oqaatigisinnavara NCD-mut naafferartumik akilersuutissanik ukiumut 80 millioner koruunit missaanniittussanik immikkoortitsisimagatta, taarsigassarsianullu naafferartumik akilersuutit taakkunannga appasinnerummata. Uagutsinnut kommunitut akikinnerussaaq, NCD-mit attartornermut akiliutigineqartartussatut pilersaarutigineqaqqaarsimagaluartunut sanilliullugu.

- Tamatuma saniatigut taarsigassarsiat ukiunut 30-nut taarsiullugu ukiuni 25-ni akilersorneqassapput. Ataatsimut isigalugu kommunimut aningaasaqarnikkut iluanaarutaasumik, kommunaldirektøri oqarpoq.

Aningaasanik taarsigassarsiniatarfinni ukiup kingulliup ingerlanerani eqqissiviilliortoqangaatsiarsimavoq, erniallu qaffakkiartuaarsimallutik. Kommunaldirektøri naapertorlugu pilersaarutinut aarlerinaatinik ilanngussilluni naatsorsuisoqarsimavoq:

- Erniat eqqarsaatigalugit aarlerinaateqarpoq, erniallu 5 procentiunissaat missingersuusiarisimavarput. Tamanna suli upperivarput. Taarsigassarsiat atorlugit aningaasalersuilersinnata taarsigassarseriaatsimik qanoq ittumik taarsigassarsinissarput eqqarsaatigineqassaaq. Allanngorartortalimmik aalajangersimasortalimmillu akuleriissitsisoqarnissaa ilimanarpoq.

Ingerlariaaseq ajornartorsiutitalik

- Nikerartumik ernialimmik taarsigassarsiguit akikinnerussaaq – immaqa 3 procentit missaannik, Ole Jakobsen nassuiaavoq.

Ole Jakobsen ilassuteqarluni oqarpoq, nammineq naliliinini tunngavigalugu Nuup qeqqani nutaamik atuarfiliornermut illoqarfimmilu ulluunerani paaqqinnittarfinnut arlalinnut taarsigassarsinissaq silatusaarnerusoq.

- Piffissap ingerlanerani atuarfinnik sanaartornissamut ukiumut 33 millioner koruuninik pissarsisarsimavugut, kisianni maannakkut pisariaqartitsisoqarmat, taarsigassarsinissaq silatusaarneruvoq.

Apeqqut: Piareersarnerup nalaani pisut ilaasa inissinneqarsimannginnerat aamma akueraat?

- Soorunami, taamaanngippammi ingerlariaaseq tamanna atorsimanavianngikkaluarparput. Sanaartornermi suli aallartitsinnagu aningaasalersuineq ukiut arlallit matuma siornatigulli inissinneqareersimasussaagaluarpoq.

- Karsimi uninngasuutigineqarsimanngillat

Apeqqut: Kommunimi aalajangersimagaluarpoq, 30 procentit aningaasanngorlugit akiliutigineqarsinnaassasut, kisianni taakkua immikkoortinneqarsimanngillat imaluunniit?

- Aap, immikkoortinneqarsimanngillat.

Apeqqut: Tatmanna arajutsineqarsimava, imaluunniit qanoq-una pisoqarsimasoq?

- Taamaattoqarsimanngitsoq, inerniliissutigaara. Ilimaginngilara aningaasanit taakkunannga 30 procentit arajutsineqarsinnaasut. Ilimagineqarsimagaluarpoq NCD-mit 100 procentimik aningaasalersorneqarsinnaassasut. Periaaserineqartorli tamanna attanneqarsinnaanngitsoq takulertorsinnaasimavara.

- NCD A/S-itut annerpaamik 60 procentinik aningaasalersuisinnaasimavoq. Taamaattumik 40 procentit amigaatigisussaasimavavut.

Apeqqut: Aningaasallu taakkua pigisimanngilasi?

- Takkukkama karsilu ammarakku karsimi uninngasuutigineqarsimanngillat, Ole Jakobsen, 2021-mi kommunaldirektøritut atorfinittoq. oqarpoq.

Kommuni taarsigassarsinissamut akuerineqassappat, NCD inissiaatileqatigiiffimmut Iserimmut kattutsinneqassaaq, kommunillu ilaatigut ulluunerani paaqqinnittarfiit arlalissuit aamma Nuummi illoqarfiup qeqqani atuarfissuarmik sanaartorneq isumagisarilissavai. Atuarfissuassaq atuarfinnut marlunnut, ASK-imut USK-imullu, taartaassaaq.