Skip to main content

Kommunalbestyrelsip nammineq suliani nersualaarpai

Kommunimit sanngiitsumit kommunimut ineriartortumut. Kommune Kujallermit tusagassiuutinut nalunaarut nassiunneqaqqammersoq isumalluarnartoq taama naatsumik nassuiarneqarsinnaavoq.

Apriilip sisamaanni kommunimut qinersinissaq sioqqullugu Kujallermi kommunalbestyrelsi naggataarutaasumik ileqquusumik ataatsimeeqqammerpoq. Namminerlu suliniutigisimasanut partiinit siuttuusunit Siumumit aamma Inuit Ataqatigiinnit nersualaarinninneq kommunip pappiaraatigut ingerlateqqinneqarpoq.

- 2013-mi qinersinerup kingorna Kommunalbestyrelsep sulinera aallartimmat Kommune sutigut tamatigut sanngiilliorpoq. Aaqqissuusseqqinnerup kingorna 2009-mi Kommunit kattussuunnerisa kingorna Kommune Kujallermut ajunaarnersuartutullusooq isikkoqalersimavoq, nalunaarummi ilisimatitsissutigineqarpoq.

Ajortullu tamarmik
Nangillugu maanna kommunalbestyrelsimiittut unammilligassarisimasaat ajortut oqaatigineqarput:

- Aningaasaqarneq ataqatigiinngilaq, kommunip innuttaasunut kiffartuussinera ataqatigiinngilaq, innuttaasunut qajannartumik inissisimasunut kiffartuussineq ataqatigiinngilaq, inuussutissarsiornermik ingerlataqartut inerisaanissaminnut periarfissat annikitsuinnaapput, innuttaasut kommunimit nussornerat annertoqaaq, attaveqaqatigiinneq ataqatigiinngilaq il.il., tamanna ilisimatitsissutigineqarpoq.

Suleqatigiinneq siunnerfigissaartoq
Ukiuni kingullerni sisamani partiit akimorlugit kommunimi suleqatigiinneq siunnerfigissaartoq naqissuserneqarpoq.

Siumumeersoq borgmesteri Jørgen Wæver Johansen erseqqissaavoq:

- Assorsuaq tulluusimaarpunga ajunaarnersuup tungaanut ingerlalersimagaluarneq naammassisaqarluarluta attanneqarsinnaasumut mumisissinnaasimagatsigu. Naak massa unammilligassat siunissatsinniittut suli annertugaluaqisut, pingaartumik attaveqaqatigiinnermut tunngatillugu, Namminersorlutik Oqartussat ingerlatsiviisa suliffeqarfiisalu sinerissamut nussorneqarnissaasa suli timitalersorneqannginnerannut tunngatillugu, taamaattoq sinaakkutassat, sapinngisarput malillugu, kommunalbestyrelsenngortussamut ingerlateqqitassatut pitsaanerpaat pilersissimavagut, taamaammat eqqissilluta qinigaajumaartussanut suliatsinnik tunniussinissatsinnut piareersarsinnaalerpugut.

Nuanniitsorsiaq ingerlateqqinneqartoq
Borgmesterip periataallaqqilluni sammisat mianernartut Namminersorlutik Oqartussat akisussaaffigisaat kommunip sunniuteqarfigisimanngisai, Namminersorlutik Oqartussanut ingerlateqqippai.

IA-mi ilaasortanut siulittaasoq Stina Egede sinnerlugu, Debora Kleistip qineqqusaarnissaq sioqqullugu ajunngitsumik nipeqarluni oqariartuuteqarpoq:

IA: Kommuni patajaatsoq
IA sinnerlugu nuannaarpunga uagut aamma, naak massa 2016-ip aallartinnerani suleqatigiinnit anissalluta toqqaasimagaluarluta, kommune ingerlalluartoq patajaatsumillu tunngavilik pilersitseqataaffigisimagatsigu, ilaatigut partiit akimorlugit ataatsimiititaliani suleqatigiilluarnerput aqqutigalugu kommunip ingerlanneqarneranik patajaallisaalluarsimavugut. Soorunami isumarput malillugu suli pitsaanerusumik arlalitsigut pitsaanerusinnaagaluarpoq, taamaattorli ataatsimut isigalugu eqqissilluta Kommunalbestyrelsemut qinigaajumaartussamut sulianik tunniussinissamut piareersaaqataasinnaavugut, Debora Kleist oqarpoq.

Kommune Kujallermi innuttaasut kommunalbestyrelsip angusaanut isumaqataanersut apriilip sisamaanni qinersisoqarnerani paasinarsissaaq.

Velkommen til debatten
  • Oqallinneq malinnaaffigalugulu peqataaffigerusukkukku cookie akuerissavat.
  • Sermitsiaq.AG-p atuartartut akunnerminni isumaqatigiinngikkaluarpataluunniit kissaatigaa, pitsaasumik oqallittoqartarnissaa. Oqallinnissamut malittarisassavut unioqqutinneqarpata oqallinnermut peqataaqqusaajunnaartitsisoqarsinnaavoq.oq .
  • Peqqarniitsumik oqaaseqartoqarsimaneranik nalunaarutiginnittoqarsinnaavoq, "rapporter" toorlugu imaluunniit ”markere som spam” toorlugu”.

Forsiden lige nu

SENESTE NYHEDER