Kommunalbestyrelsimit mittarfik 1500 meterisut takitigissasoq suli neriuutigineqarpoq
Kommuni Kujallermi kommunalbestyrelsip Qaqortumi timmisartoqarfiliornissamik pilersaarut pillugu Naalakkersuisup Naaja Nathanielsenip ippassaq nalunaarutaa tigulluarneqarpoq. Mittarfiup naannerunera aningaasaqarnermut pitsaanerpaajunissaanik oqaaseqarnera tusaatissatut tigusimavaat.
Attaveqaatinut Naalakkersuisup Naaja Nathanielsenip (IA) Qaqortumi nutaamik timmisartoqarfiliornermi mittarfiup naannerusinnaaneranik oqaaseqarnera Kommuni Kujallermit isornartorsiuisoqarnissamut tunngaviliisinnaagaluarpoq.
Kommuni 1500 meterisut takissusilimmik mittarfittaarnissamut arlaleriarluni neriorsorneqartarsimavoq, Kommuni Kujallermilu borgmesteriusimasup Kiista P. Isaksenip (S) Simon Simonsenillu (S) naannerusumik mittarfittaartinneqarnissaq siusinnerusukkut itigartitsissutigisimavaat.
Siumulli sinnerlugu ilaasortat taakku marluk kommunalbestyrelsimi issiasut tusagassiorfinnut nalunaaruteqarnermi neriuuteqaqataallutik oqaaseqarsimapput.
- Kommuni Kujallermi siunissaq qaammariartorpoq. Nunap immikkoortuani inuussutissarsiornikkut attaveqarnikkullu kommunip tamarmiulluni ataatsimoorussamik pilersaarusiornissaa pingaaruteqarpoq. Siunissami ingerlatsinissaq pitsaanerpaaq qulakkeerniarlugu Naalakkersuisut kommunimilu soqutigisaqaqatigiit qanimut oqaloqatigisarniarpakka, står der blandt andet.
Aningaasat amigaataanerat uggorineqartoq
Kommuni Kujallermi borgmesteri Stine Egede (IA) kommunalbestyrelsi suliami kiisami susoqalerneranik nuannaarutiginnittoq sinnerlugu nalunaarummi atsiorsimavoq.
- Nuannaarutigaara Qaqortumi mittarfiliornissaq pillugu inatsisartut aalajangigaata piviusunngornissaanut Naalakkersuisut oqariartuutaat Kommune Kujallermi kommunalbestyrelsimit tiguneqarmat.
Qaqortumi timmisartoqarfiliornissaq imminut akilersinnaanngimmat Nunatta Karsianit aningaasaliiffigineqartussaasoq, taamalu taarsigassarsinikkut aningaasaliiffigineqarsinnaanngitsoq pillugu aningaasaliissutissanik suli immikkoortitsisoqarsimanngilaq.
- Naalakkersuisuusimasut aningaasanik immikkoortitsisimannginnerat soorunami kommunalbestyrelsimi ajuusaarutigaarput, immikkoortitsisimasuuppatami mittarfimmik 1500 meterinik takissusilimmut aningaasat qulakkeerneqarsimasuuppata tamanna ajornannginnerusimassagaluarpoq.
Narsarsuaq ernummatigineqartoq
Kommunalbestyrelsimit mittarfissap 1500 meterisut takissuseqarnissaa suli neriuutigineqarpoq, naak inuiaqatigiit aningaasaqarnerannut nalilersuisimanerup takutissimagluaraa piffissaq qaninnerusoq ungasinnerusorlu eqqarsaatigalugit 1199 meteriunissaa imminut akilersinnaanerusoq kommunalbestyrelsip tusaatissatut tiguasimagaluaraa.
Mittarfiup kingusinnerusukkut tallineqarsinnaaneranik oqariartuuteqarsimaneq maluginiarsimavat. Nutaamik timmisartoqarfiliortoqarpata Narsarsuarmi timmisartoqarfik maanna atuuttoq qulimiguulinnut mittarfinngortinneqassaaq, tamanna nunaqarfimmut annertuumik sunniuteqassalluni.
Politikkerinit erseqqissaassutigineqarpoq, Narsarsuarmi innuttaasut Narsarsuup siunissaa pillugu ernummateqarlutik oqaaseqartarsimsut.
- Narsarsuup siunissaata aaqqiiffigineqarnissaa ilungersorluta sulissutigissavarput. Suliap Naalakkersuisuni uninngatinneqarsimanera sivisuallaarsimavoq.