Kommunalbestyrelsimi ilaasortaq: Tarnikkut nappaatillit salliutinneqassapput

- Inatsimmik malinninnissamut pisussaaffeqarpugut.

Inga Dora G. Markussen Kommuneqarfik Sermersuup kommunalbestyrelsiani ilaasortaq Siumullu gruppianni siulittaasoq taamatut oqarpoq.

Sermitsiaq.AG-p innuttaasut tarnikkut nappaatillit 21-t initaarnissaminnut maannakkorpiaq utaqqisut - tamanna inatsimmik unioqqutitsinerungaluartoq - pillugit marlunngornermi ilanngutassiaqarnerata kingorna taamatut oqaaseqarpoq.

- Allatut periarfissaqanngilagut. Suliassaq oqimaappat oqimaanngippalluunniit tamanna aaqqiiffigisussaavarput, Inga Dora G. Markusseni utaqqisut allattorsimaffiat innersuussutigalugu oqarpoq.

Siumukkormiut ugguartut

Taassuma kingullermik missingersuutit pillugit isumaqatigiissummi pingaarnersiuisimaneq qularnartoqartippaa, Siumut - Inga Dora G. Markussenip nammineq oqarneratut - isumaqatiginninniarnermut peqataatinneqarsimanngimmat, partiip 1,2 milliarder koruuninik taarsigassarsiniarnermut akuersaarsimannginnera pissutigalugu.

Inga Dora G. Markussenip ilisimatitsissutigaa, innuttaasut tarnikkut nappaatillit najugaqaqatigiiffinni aamma najugaqarfinni illersugaasuni initaarnissamik utaqqisut amerlassusaat ikilisinniarlugit Siumumit missingersuutinut atatillugu kissaatigineqarsimasut ilagigaat.

- Tamanna soorunami ugguarisupilussuuarput.

Taassuma oqaatigaa, isumaqatigiissummi ersernerluttoq, partiit, taakkununnga ilanngullugit IA borgmesterilu Avaaraq S. Olseni missingersuutit isumaqatigiissutigineqarneranni inatsimmik malinninniarluni qanoq iliuuseqartoqalersaarnersoq.

Pingaarnersiuinissaq apeqqutaasoq

Inga Dora G. Markussenip nassuiaatigaa, tassunga taarsiullugu sissami kusanartorsuarmik inuinnarnut aqqutiliornissamut aningaasanik immikkoortitsisoqarsimasoq:

- Isumaqarpunga kusanarluinnartumik peqarnissaq salliutinneqarsimasoq, tamannali maannakkorpiaq pingaarnersaanngilaq, taanna innuttaasut tarnikkut nappaatillit atugarliornerat innersuussutigalugu oqarpoq.

Siumumi politikkerip oqaatigaa, utaqqisut ikilisinneqarnissaat pingaaruteqarnerpaasoq:

- Innuttaasorpassuaqarpugut atugarliortunik neqeroorummik matumannga pisariaqartitsisunik. Tamatta nalunngilluinnarparput innuttaasut atugarliortut qanorluunniit iliuuseqarsinnaasut: Assersuutigalugu persuttaasinnaapput - naak taamatut iliornissaq siunertarinngikkaluarlugu, peqqissuunnginnamilli taamatut iliorsinnaasarlutik, taanna oqarpoq, nangillunilu:

- Taamatut pisoqarsinnaanera naammattumik ilisimasaqarfiginngilarput.

Piumassuseqarluartut

Inga Dora G. Markussenip kingullermik missingersuutit pillugit isumaqatigiissut tunngavigalugu oqaatigaa, assigiinngitsorpassuarnik oqaaseqartoqarsimasoq, pineqartumulli aningaasanik qanoq immikkoortitsisoqartigisimanersoq ersernerluttoq.

- Pineqartumut aningaasanik immikkoortitsisimanersut takunissaa qilanaaraarput. Tamatumali isumagineqarnissaa anguniarlugu sapnngisatsinnik iliuuseqarsimavugut.

Siumut isumaqatiginninniarnermut peqataatinneqarsimannginnera assorujussuaq pakatsissutigisimavaa, partiimi - Inga Dora G. Markussenip oqarneratut - ajornartorsiutinik aaqqiissuteqarnissamut piumassuseqarluarmat.

Inissisimaffimmut maannakkorpiaq iluaqutaassasoq

Sermitsiaq.AG-mit borgmesteri Avaaraq S. Olsen apersorneqarusussimagaluarpoq. Tamannali pisinnaasimanngilaq. Borgmesteri apersorneqarnissamut taarsiullugu allakkatigut akissuteqarsimavoq, tassani erseqqissaassutigaa missingersuutini misissueqqaarnissamut aningaasanik immikkoortitsisoqarsimasoq, innuttaasut sakkortuumik qisuariartartut inissaqartinneqalernissaannik kinguneqartussamik:

- Naluara Siumumit kissaatigineqarsimanersoq, najugaqarfissap qanoq akeqarnissaa sumiinnissaaluunniit nalullugit tamatuma missingersuutinut ilanngunneqarnissaa. Taamatut suliniuteqartoqartanera misilittagaqarfiginerlupparput. Taamatummi iliuuseqassagutta suliniut naammassinngitsoorneqarsinnaavoq.

Avaaraq S. Olsenip peqatigitillugu erseqqissaassutigaa, tarnikkut nappaatillit inissaqartinniarneqarnerat partiit isumaqatigiissuteqarsimasut pimoorulluinnaraat.

- Suliassaq akisussaassuseqarluta tigusimavarput. Taamatut inissisimaffeqarneq maannakkorpiaq aaqqiiffiginiarlugu, innuttaasunut initaarnissamik utaqqisunut oqilisaassiffissanik tallimanik pilersitsinissamut ukiumut fem millioner koruuninik aningaasaliissuteqartassaagut. Neqeroorut tamanna aappaagu piviusunngortinneqareertussaavoq.