Kommunalbestyrelsi isumaqatigiissoq Kuannersuarni aatsitassarsiorfiliornissamik pilersaarutit Greenland Mineralsimit tunuliaqutaaffigineqartut pillugit Kujataani innuttaasunik ataatsimiititsinissat pillugit Naalakkersuisunut ammasunik allagaqarput.

- Kuannersuarni aatsitassanik uranitalinnik piiaasoqarnissaa eqqartorneqalertillugu kujataani innuttaasut avissaartuuttutut oqaatiginiarneqartarput, taamaammat Kuannersuit pillugit oqallinneq annerusoq pisariaqarluinnarpoq, kommunalbestyrelsi allappoq.

- Taamaakkaluartorli tusarniaanerit pilersaarutigineqartut Kujataani innuttaasunik amerlasuunik qularnanngitsumik peqataaffigineqarusussammata, piffinni tusarniaaviusussani marloriarlusi pingasoriarlusiluunniit tusarniaanerit ingerlanniarnerisi paaserusunnarpoq. Matumanimi innuttaasut isumaat qanimut tusarnaassallugit pingaaruteqartorujussuummat, kommunalbestyrelsi sooq Nanortalimmi nunaqarfiinilu ataatsimiititsinissamik pilersaaruteqartoqannginneranik aamma paasisaqarusuttoq, allappoq.

Nanortalik  nunaqarfiilu?

Kommunalbestyrelsi peqatigiiffik Urani Naamik assigalugu innuttaasut peqataarusuttut tamarmik peqataasinnaatitaassanerannik ernummatiginnippoq, corona pissutigalugit killilersuinernit ataatsimiinnermut ataatsimut inuit amerlanerpaamik 100-t peqataasinnaanerat killilerneqarsimammat. Tamatuma saniatigut kommunalbestyrelsi isumaqarpoq, ataatsimiititsinerit naammattumik siamasissuseqanngitsut.

- Narsaq, Igaliku, Narsarsuaq, Qassiarsuk, Qaqortorlu kisimik tikinneqarniarput; Nanortalik nunaqarfittagullu allat tikinneqarlutik tusarniaavigimeqarnissaannut pilersaarummik takusassaqanngilagut, oqaatigineqarpoq.

Urani Naamik isumaqarpoq, matoqqatitsisoqarnerata nalaani innuttaasunik ataatsimiititsinerit ingerlanneqarnissaat tamat oqartussaaqataanerannik ingerlatsinerorpalaanngitsoq, aamma IA-meersoq Sofia Geisler Mariane Paviasenilu isornartorsiuipput, isumaqaramik corona pissutigalugu killilersuisoqartillugu innuttaasunik ataatsimiititsinisssat pissusissamisuunngitsut.

Tamatumami kinguneranik aamma soqutigisaqartut immikkullu ilisimasallit Danmarkimeersut nunanillu allaneersut Kalaallit Nunaannut angalasinnaanngillat innuttaasunillu ataatsimiititsinernut peqataasinnaanatik.

KNR toqqaannartumik aallakaatitsisinneqarli

Kommunalbestyrelsip neriuutigaa, Naalakkersuisut innuttaasunik sullissivik innuttaasunut paasissutissiinissamut atorumassagaat.

- Matumani Naalakkersuisut Kalaallit Nunaata Radiuanut sammisaq pillugu oqallinnerit paasissutissanillu annerusunik inuiaqatigiit immersorneqarnissaannut kaammattuuteqarnissaannik piumaffigerusuppavut.

Nutaarsiassaqartitsinermut pisortaq Mikkel Bjarnø Lund naapertorlugu KNR Naalakkersuisunik oqaloqateqarpoq, innuttaasunik sullissiviup ataatsimiititsinernik qanoq aallakaatitsisinnaanera pillugu.

Taanna erseqqissaalluni oqarpoq, sammisaq nalinginnaasumik innuttaasunillu ataatsimiititsinerit annertuumik soorunami sammiumaaritik.

-Ataatsimiititsinerit qanoq sammiumaarnerivut aalajangiussimanngilarput. Innuttaasunik ataatsimiititsineq ataaseq toqqaannartumik aallakaatikkumaaripput isumaliutigaarput. Maannakkorpiaq periarfissanik tamanik misissuivugut ungasinngitsukkullu nalunaaruteqarumaarluta, taanna Sermitsiaq.AG-mut oqarpoq.

Kommunalbestyrelsimit allakkat atsiorneqarsimapput Siumumit borgmesterimit Kiista P. Isaksenimit, Siumumi gruppip siulittaasuanit Karla Egede Bisgaardimit, Inuit Ataqatigiinni gruppip siulittaasuanit Asmus Hansenimit aamma Atassummit Kim Ezekiassenimit.