Kollegiani ineqartoq: Inissiaq najugassaanngilaq

Kollegiani inissiap ajoqutai pillugit saaffiginnittaraluarnerit maannamut kinguneqarsimanngillat. Inissialli akornutai pillugit pisortaq aperineqarami, oqaatigaa inissiaq taamaattoq inigineqarnissaminut tulluanngitsoq.

Matut igalaallu sinaanni qisuit, oqoqarneranik takussutissaasinnaasunik, qernertilersimasut. Ini silaannaluttoq, sinittarfillu sakkortuumik kuuffissunnitsoq. Anori sialullu inimut isaasartoq, igalaat matullu ussiinneri pissutigalugit.

Niuernermik Ilinniarfimmi ilinniartoq, Qillaq Lyberth, C. E. Jansensvejimi ilinniartut Nuummiut inaanni ineqarpoq. Augustimi 2022-mi inimut iserterpoq, taamalini inissianik allaffissornikkut akisussaasunut, Iserit A/S-imut akornutit arlallit pillugit saaffiginnittaraluarpoq, iluarsisassalli suli iluarsineqanngillat.

- Matu sinaatigut ussiitsoq aamma matut igalaallu sinaat oqoqarpasittut pillugit Iserit A/S-imut saaffiginninnikuuvunga. Aamma inimut akiliinaarsimaneq pillugu saaffiginninnikuvunga. Allattoqarfiup sullissiniarnera malunnaateqanngitsoq assut ilungersunarpoq. Saaffiginninnerit iliuuseqarnermik kinguneqarneq ajortut nukinnik atuinarujussuarput, Qillaq Lyberth oqaluttuarpoq.

Taanna oqaluttuarpoq inimini sinittarfimmi maanna sinissinnaanani kuuffissunnimmik sakkortuumik tipeqalersimammat. Tamassumunnga tunngatillugu akissutisinissani suli utaqqivaa.

Sermitsiaq.AG-p attartortumit Iserit A/S-imut allakkatigut saaffiginnissutit arlallit pisimavai. Taakkunani allassimavoq saaffiginnissut kingulleq 18. januar nassiunneqarsimasoq, sulilu akissutissamik utaqqisoq.

Pisortaq: Soorunami misissorneqassaaq

Sermitsiaq.AG-p Iserit A/S-imi pisortaq ilinniartunut inissiani ineqartup isornartorsiutai pillugit paasiniaaffigaa. Pisortaq Torben Kortegaard Sermitsiaq.AG-mut nassuiaavoq ilinniartut inaat inigineqarunnaarnerini ilaatiguinnaq annertunerusumik iluarsartuunneqartartut, inissiani ineqartut sivikinnerusumik attartortuusarneri pissutigalugit.

Qillaq Lyberthilli Sermitsiaq.AG-mut nassuiaatai pillugit pisortaq nassueruteqarpoq nassuiaatigineqartut aallaavigalugit inissiaq inigineqarsinnaanngikkallartutut nalilertariaqartoq.

- Inissiaq taama ajortigisutut nassuiarukku, taava inigineqarsinnaanngitsutut nalilertariaqarpara. Soorunami misissorneqartariaqarpoq, teknikkeqarfimmiullu misissuisussaapput, Iserit A/S-imi pisortaq Torben Kortegaard oqarpoq.

Vakantimik inissinneqarallarsinnaasoq

Allakkatigut akissuteqarnermini siusinnerusukkut Torben Kortegaard nassuiaanikuuvoq Iserit A/S inissiat aaqqissuuttariaqalerneri pissutigalugit inigineqarsinnaajunnaarpata, Iserit A/S inigigallagassanik inaataateqartoq.

Inissianik attartortut inimik qanoq paarsilluarsimatigineri apeqqutaallutik inissiat iluarsartuunnissaasa pisariaqarnerat aamma nikerartarpoq. Inissiaq qimanneqartillugu misissorneqartarpoq, suli attartorneqarsinnaanera qulakkeerniarlugu.

- Iluarsartuussisarpugut pisariaqartillugu. Iluarsartuussinerit annertuut pisariaqalerpata ineqartoq inigigallagassamut nuutsissinnaasarparput, Torben Kortegaard oqaluttuarpoq.

Pisortaq ilisimatitsivoq Iserit A/S-ip ilinniartunut inissiaatai tamarmik imermik isaasoqartartut ilisimallugit, taakkulu iluarsartuunniarlugit annertuumik sulisoqartoq.

Powered by Labrador CMS