Skip to main content

Kollegialiortiterneq aallartilluartoq

Illoqarfinni ilinniarfeqarfiusuni tallimani ilinniartut inissaannik sanaartorneq aallartilluarpoq. Ineqarnermut naalakkersuisup aamma ilinniartitaanermut naalakkersuisup tamanna nuannaarutigaat. Ilinniartut inaat siulliit aappaagu naammassissangatinneqarput.

Illoqarfinni ilinniarfeqarfiusuni tallimani, Ilulissani, Aasianni, Sisimiuni, Nuummi aamma Qaqortumi ilinniartunut inissianik sanaartornerit aallartilluarput.

Illoqarfinni taaneqartuni avannarpasinnerusuni, Ilulissani, Aasianni Sisimiunilu ilinniartut inissiaat nutaanngilisut taarserneqartussat isaterneqalereersimapput. Nuummi Qaqortumilu suliffinnik pilersitsiortorneq aallartereersimavoq, qaartiterinerillu ingerlanneqarlutik.

Ineqarnermut naalakkersuisoqarfik aamma ilinniartitaanermut naalakkersuisoqarfik taama tusagassiorfinnut nalunaaruteqarput.

- Ilinniartut pitsaasunik avatangiiseqarnissaat pingaaruteqarpoq, ilinniakkaminnik sammisaqarnissaminnut eqqissisimaffiusinnaammata. Kisiannili ilinniartunut inissiat najugaqarfiinnaanngillat. Aammali ataatsimoorfiupput, tapersersorneqarnermik toqqissisimanermillu misigiffiusinnaasut. Taamaattumik maanna sanaartornerit aallartinneqarsimammata nuannaarutissaavoq, ineqarnermut naalakkersuisoq, Naaja Nathanielsen oqarpoq.

- Nunatsinni ilinniartut, soorlu ilinniartut meerallit, inuusuttut angerlarsimaffimminnik imaluunniit ilinniartut inaannik ataatsimoorfiusunik qimatseqqammersut inissianik nutaanik ilusilinnik, ilinniartut pisariaqartitaannut naleqqussakkanik naatsorsuutigisaqarsinnaalermata nuannaarutigeqaara isumalluarfigalugulu, ilinniartitaanermut naalakkersuisoq Peter P. Olsen oqarpoq.

Ilinniartunut inissiat siulliit aappaagu

Ilinniartunut inissiat illoqarfinni ilinniarfeqarfiusuni sanaartorneqartut 16-iussasut, katillugit 528-nit najugarineqarsinnaasut, Naalakkersuisunit pilersaarutaavoq.

Ilinniartunut inissiat siulliit marluk Qaqortumiittussat ukiakkut 2022-mi naammassillugit atulereersimanissaat naatsorsuutigineqarpoq. Sisimiunilu inissiat naammassisussat kingulliussapput, tassa 2024-mi atulertussatut naatsorsuutigineqaramik.

Pilersaarutit ima isikkoqarput:

  • Ilulissat: Ilinniartunut inissiat nalinginnaasut marluk, katillugit 75-inut inissaqartitsisut, aasakkut 2023-mi atulissangatinneqarput. Ilinniartunut inissiat marluk nutaanngilisut isaterneqassapput.
  • Aasiaat: Ilinniartunut inissiat nalinginnaasut marluk, katillugit 62-inut inissaqartut aasakkut 2023-mi naammassisussanngorlugit sanaartorneqassapput. Inissiat atortut sisamat nutaanngilisut isaterneqassapput.
  • Sisimiut: Ilinniartunut inissiat nalinginnaasut pingasut, katillugit 72-inut inissaqartitsisut ukiukkut 2024-mi atulertussanngorlugit sanaartorneqassapput. Inissiat atortut sisamat nutaanngilisut isaterneqassapput.
  • Nuuk: Ilinniartunut inissiat nalinginnaasut arfineq-marluk, katillugit 219-inut inissaqartitsisut upernaakkut 2023-mi atulertussatut sanaartorneqassapput.
  • Qaqortoq: Ilinniartunut inissiat nalinginnaasut marluk, katillugit 100-nut inissaqartitsisut, ukiakkut 2022-mi naammassisussanngorlugit sanaartorneqassapput.       
Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER