Kofoeds Skolemi pisortaq nutaaq
Kommuneqarfik Sermersuumi borgmesteriusimasoq Charlotte Ludvigsen Kofoeds Skolep pisortartaaraa.
Charlotte Ludvigsen Kofoeds Skolemi februaarip aallaqqaataani pisortanngussaaq.
Siulersuisuni siulittaasoq Malik H. Olsen tusagassiuutinut nalunaarummi taama ilisimatitsivoq.
- Charlotte Ludvigsen Kofoeds Skole Nuummi suliumammat nuannaarutigeqaara. Nuummi innuttaasut pisariaqartitsisut pillugit suliat siuarsaaqataaffigissavai, taamaalillunilu Kommuneqarfik Sermersuumi misilittakkani atorlugit siuarsaaqataasinnaassaaq, taanna oqarpoq.
Kofoeds Skole Nuuk suliniutitut 2016-imi aallartippoq. Ullumikkut ingerlatsiviuvoq imminut pigisoq Kommuneqarfik Sermersuumi ingerlatsinissamut isumaqatigiissuteqartoq. Innuttaasut 200-it sinnerlugit ukiumut Kofoeds Skole Nuummiittarput.
Charlotte Ludvigsenip Kommuneqarfik Sermersuumi borgmesteritut tunuarnermi kingorna siunissaq assut eqqarsaatersuuteqarfigisimallugu oqaluttuarpoq, inuiaqatigiinnilu toqqaannartumik sunniuteqarluni allannguerusulluni aalajangersimavoq.
- Inuiaqatigiinni pisariaqartitsisut ataqqineqarlutik inuunissaat pingaartitarilluinnagaraara. Kofoeds Skole pitsaanerusumik inuuneqarnissamut tunngaviliisuuvoq. Ilisimasakka misilittakkakkalu atorlugit tassani allanngueqataarusuppunga, taanna oqarpoq.
- Sunniuteqarnavianngilanga
Charlotte Ludvigsen ullumikkut kommunalbestyrelsimut ilaasortaavoq – Kofoeds Skolemilu pisortaanermi saniatigut ilaasortaaginnassaq.
Kisianni Charlotte Ludvigsenip oqarnera naapertorlugu ajornartorsiutaanavianngilaq. Tamanna soorunami Kofoeds Skolemi atorfinitsitsiniarnermut ataatsimiititaliamit oqaluuserineqarsimasoq, taanna nassuiaavoq.
- Kommunalbestyrelsimi meeqqanut ilaqutariinnullu ataatsimiititaliami ilaasortaavunga, taamaalillunga Kofoeds Skolemut tunngatillugu toqqaannartumik attuumassuteqarnavianngilanga. Kisianni kommunalbestyrelsimi ataatsimiikkaangatta Kofoeds Skolemut tunngatillugu akuliussinnaanngilanga, taamaalillunga sunniuteqarnavianngilanga, taanna Sermitsiaq.AG-mut oqarpoq.
Tamatumunnga atatillugu pisortatut tunuartoq Gudmundur ”Gujo” Thorsteinsson Kofoeds Skole Nuuk ammarmalli naammassisarpassuanut Malik H. Olsenip qujaffigiumavaa.