Kofoeds Skole Tasiilami pilersitsiniarpoq
Kofoeds Skole Nuummi suliniuteqartoq, nunap ilaani suliaminik annertusaaniarluni pilersaaruteqarpoq. Tasiilami Kofoeds Skoleqartoqalernissaa pilersaarutinut ilaavoq.
Kofoeds Skole suliaminik nunap ilaanut annertusaaniarluni piffissami aalangersimasumi suliniuteqarsimavoq. Suliniutinut ilaavoq Tasiilami Kofoeds Skoleqalernissaq.
Kofoeds Skole Facebookimini taama allappoq.
- Tasiilami Kofoeds Skolemik pilersitsisoqarnissaani Nuummi Kofoeds Skole qanimut suleqatigineqassaaq. Nuummi Kofoeds Skole ukiuni tallimani kingullerni pitsaalluinnartunik angusaqarsimavoq, allaqqavoq.
Kofoeds Skole, Kommuneqarfik Sermersooq aamma kajumissutsiminnik suliaqartut Tasiilami Kofoeds Skoleqalernissaa suleqatigiissutigaat.
Katsorsartinnissamik neqeroorut
Nuummi Kofoeds Skole innuttaasut inuuniarminnikkut ilungersuuteqartut imminnut ikiorsinnaalernissaat anguniarlugu ikiuisarpoq.
Facebookimini erseqqissaavoq Tasiilami Kofoeds Skoleqalernissaq innuttaasunut iluaqutaassasoq, soqutiginnittoqarluartorlu.
- Kofoeds Skolep soqutiginnittut suleqatigerusuppai, soorlu aanngajaarniutinik atuisut katsorsartinnissaannut neqerooruteqarnissami, allassimavoq.
- Kofoeds Skolep pingaartippaa inuiaqatigiit peqataatinneqarnissaat - Tasiilami innuttaasut peqataatinneqarnissaannut suliniuteqartoqassaaq.
Tasiilami pilersitsisoqarnissaanut suliniutit arlallit ingerlanneqartut, ilisimatitsissutigineqarpoq.