Kofoeds Skole 53.000 koruuninik tunissuteqarfigineqarpoq

Lions Club Odensemit aningaasat Kofoeds Skolemi atuisut kissaataat malillugit timersornermut atortunut atorneqassapput, pisortaq ilisimatitsivoq.

Lions Club Odensep tapiissuteqartitsisarfik ukiuni 50-ini kingullerni ingerlataa maanna matuneqarpoq, aningaasallut sinneruttut 53.843 koruunit Nuummi Kofoeds Skolemut pingasunngornermi 15. marts tunissutigineqarput.

Pisortaq Charlotte Ludvigsen, pikkorissarnerminut atatillugu Danmarkimiittoq, checkimik tigusivoq, tallimanngornermilu ullaakkut Kofoeds Skolemut atuisunut takutikkiartorpaa.

- Nuannaartorujussuupput. Lions Club Odensep aningaasanut sinneruttunut qinnuteqaaterput akuerimmassuk qujamasoqaagut. Kofoeds Skolemi atuisutsinnut isumalerujussuuvoq, Charlotte Ludvigsen, Nuummi Kofoeds Skolemi pisortaq oqarpoq.

Aningaasat timersornermut atortunik, soorlu arpattarfinnik, iputtuusaarutinik, sikkilerutinik aamma kamippannik timersuutinik Kofoeds Skolemiittartunit atorneqarsinnaasunik pisinermut atorneqassasut, taanna ilisimatitsivoq.

Nuummi Kofoed Skole innuttaasunit 25-t missaanniittunik ulluinnarni atuisoqarpoq. Ataasinngornikkut 50-t missaanniittut takkussinnaasarput.

Peqqissuseq ukkatarineqartoq

Lions Club Odensemut atuisut timersornermut atortunut akissaqalernissamut kissaateqarnerat malillugu qinnuteqartoqarsimasoq, Charlotte Ludvigsen ilisimatitsivoq.

- Timersornermut atortoqalernermi innuttaasut maani atuisut peqqissutsiminnik ukkatarinninnerulersinnaanerannik kinguneqarpoq, taakkulu avatangiisini sungiusimasaminni toqqissisimaffigisaminnilu timersornissamut periarfissaqalerput. Lions Club Odensemiillu tusaaneqarnertik nuannaarutigaat, Charlotte Ludvigsen oqarpoq.

Aningaasat legatimit, allaffimmiuunerup Fenny Magdalene Hansenip Lions Club Odensemut kingornussassarititaaneerput, aningaasallu tassanngaanneersut Kalaallit Nunaanni inunnik ikiuiniarnernut atorneqarnissai aalajangerneqarpoq, Lions Club Odensemit aqunneqarlutik.

Piffissami kingullermi legatimut qinnuteqartoqartarsimanngilaq, aningaasallu negativimik erniaqalersinneqalersimapput. Taamaammallu Lions Club Odensensep legatit ukiut 50-it sinnerlugit aqoreerlugit matuniarlugu aalajangersimavoq.

Powered by Labrador CMS